Afitos, est crisi in Ispagna, ma creschet s'allarme fintzas inoghe

In una barantina de tzitades, de cada comunidade autònoma de s’istadu ispagnolu, a mìgias sunt falados in pratza protestende contra s’aumentu de sos prejos de sos afitos, sa crisi abitativa e su turismu de massa. Cunvocadas dae su sindacadu de sos incuilinos, sas manifestatziones ant tentu arta s’atentzione pro unu problema chi est in palas de is traballadores e de sas fàscias prus dèbiles de sa sotziedade. Cunforma a unu raportu de sa banca tzentrale ispagnola, belle su 40% de sas famìlias ispagnolas gastat prus de su 40% de su rèdditu pro pagare s’afitu o su mùtuu sende chi in sos ùrtimos deghe annos sunt raddopiados su costu mesanu de allogu e su preju a su metru cuadru. E s’atentzione est arta finamentas in su guvernu. Su cabu de s’esecutivu Pedro Sánchez devet mantènnere sas promissas suas a s’eletoradu de manca. E semper a manca de s’alleàntzia sua devet abbaidare, cun sa formatzione Sumar chi fiat parte de sos corteos. Ma dae s’amministratzione tzentrale de Madrid sunt narende chi est netzessària sa collaboratzione de sos Comunes e de sas Regiones. De onni manera sa positzione de su guvernu sotzialista est sa de intzentivare a is meres de sos apartamentos cun isgràvios fiscales finas a su 100% de su currispondente de s’Irpef nostra, s’in casu fissent un’afitu in lìnia cun su livellu inditadu dae su guvernu. Non pròpiu una positzione sotzialista chi diat dèvere tassare chie nche lu bàrigat cussu livellu. Tassados imbetzes, semper in intro de sa proposta guvernativa, sos afitos curtzos in cantu atividade econòmica. In sas ideas de s’esecutivu b’est fintzas un’impresa pùblica pro s’edilìtzia pùblica pro su fràigu de 180mìgia abitatziones. Sos manifestantes pedint medidas atzudas pro chi s’agatent solutziones a tretu de soddisfare sos bisòngios issoro contra a s’ispeculatzione. De su restu lu narat sa Costitutzione matessi a s’artìculu 47: «Totu sos ispagnolos ant su diritu de si gosare de un’allògiu dignitosu e adeguadu. Sas autoridades pùblicas ant a promòvere sas cunditziones netzessàrias istabilende sas normas dèghidas pro chi custu diritu siat efetivu». E, difatis, «prevenende s’ispeculatzione». Argumentu chi interessat finas a nois: in duos annos afitos de 150 èuros in prus, tìtulat oe sa Nuova.