A mesaustu Kabul est ruta: sos talebanos si sunt torra leados su poderiu de s’Afgànistan.
Su presidente betzu de sos Istados Aunidos, Trump, aiat firmadu un’acordu in Doha in ue si naraiat chi, pro mantènnere s’òrdine e sa paghe intre talebanos e guvernu, s’esèrtzitu americanu depiat torrare a domo, ca s’esèrtzitu afganu podiat gherrare cun àsiu contra a sos estremistas. Biden at atzetadu cussu tratadu e at sighidu in cussa sèmida. Cando però sa recuida est inghitzada est tzucada fintzas sa conchista de is talebanos. S’idea fiat de agabbare sa ghirada s’ùndighi de cabudanni, posca binti annos dae s’atacu contra a sas turres cròbinas de New York, ma sos pianos sunt cambiados a sa lestra.
S’operatzione americana fiat tzucada posca s’atacu terrorìsticu de su 2001 pro cumbatare s’estremismu de sos talebanos e pro batire sa democratzia. Una genia de vindita e òbligu coloniale. Custas fiant sas punnas chi aiat naradu su guvernu USA, chi at proadu a fraigare un’Istadu nou, comente in Iraq. Sunt mortos a mìgias e sunt istados gastados milliardos. Como chi est totu agabbende nos semus abigiados chi sa gherra l’ant bìnchida sos estremistas e chi de democratzia, a dolu mannu, pagu nde fiat lòmpida e nudda nde at a abarrare.
Sa veridade de custa pèrdida est chi in Afgànistan s’esèrtzitu (chi teniat aèreos e carrarmados) non cheriat peleare pro su Paisu chi sos americanos aiant fraigadu in sos binti annos de ocupatzione: su fallimentu prus mannu est custu. Unu fràigu fatu sena cumprendere de a beru sa cultura cumplessa de sa populatzione. Un’Istadu corrùmpidu e pagu efitziente, chi dipendiat de su totu dae sos USA. Petzi in carchi tzitade sa bida si fiat acurtziada a cussa de s’Otzidente, ma in fora de custas sighiant pro su prus sos usos de dae in antis.
Como su pagu de deretos e de libertade chi sos afganos aiant tastadu est agabbadu. Sos talebanos sunt giai pessighende is òmines chi ant agiudadu sos otzidentale e mescamente sas fèminas chi boliant èssere lìberas. A nois tocat de acollire chie est fuende, sena bogare murmutu perunu.
Gabriele Tanda
Leave a comment