Su prus de sas bortas su male est una mantza iscurigosa e carca. Pensemus a sas àeras pìghidas de Teheran tintas a nieddu dae su petròliu bombardadu. Ma su colore de sa tragèdia podet àere sas tonalidades de su candore. E inoghe tocat a pensare a sas àeras de su Lìbanu meridionale e a su fòsforu biancu de sas esplosiones israelianas. S’assòtziu Human rights watch at in pessu contadu su chi b’at acontèssidu su 3 de martzu in sa tzitade de Yohmor. Sas acusas indiritzadas a s’esèrtzitu israelianu sunt graes: impreu illegale de cussasa munitziones in àreas residentziales populadas. S’anàlisi minutziosa movet dae sete imàgines geolocalizadas chi ammustrant a craru sas nues tìpicas a tentàculos prodùidas dae s’esplosione de ballas de artillieria de 155 mm sèrie M825. No est sa prima borta chi custu “ispetàculu” illùminat sas cuntierras de sa regione. Sos pretzedentes sunt tzicatritzes galu abertas: dae s’impreu massissu de s’operatzione Prumu fusu in Gaza, intre su 2008 e su 2009, in susu. Mancari su fòsforu biancu siat tecnicamente ammìtidu pro creare cortinas fumògenas, s’impreu suo contra a sos tziviles est unu crìmine chi no ammitet giustificatziones. Ramzi Kaiss, chircadore de Hrw, at torradu a nàrrere chi sas cunsighèntzias pro chie respirat o tocat custa sustàntzia sunt disastrosas e permanentes. Su fòsforu biancu divorat sa carre e arrivat finas a sos ossos. In casu de cuntatos cun sa pedde podet cajonare brujaduras profundas, chìmicas e tèrmicas. «Sas àreas interessadas de sa cute esposta podent apàrrere grogas e presentare ustiones necròticas inghiriadas dae tessutu iscatadu», iscriet s’Oms. Si abarrat in sa pedde, in prus, su fòsforu biancu podet torra comintzare a brujare cada borta chi sa ferida est a cuntatu cun s’àera. In intro de careba, imbetzes, podet ingendrare dannos mannos a sos òrganos.
mauro piredda
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment