– de Màriu Sanna –
Chistionare de su dut. Giuanne Biccai pro mene non est fàtzile pro nudda; ca s’amistade fiat nàschida annos meda innantis de sa collaboratzione politico- amministrativa.
Giuanne Biccai, fiat nàschidu in Sindia, bidda de làcana intre de su Marghine, sa Pianalza e sa Campeda, dae una fàmilia manna de allevadores de bestiàmine; mancari sa passione sua pro s’istòria, contaiat semper ispàssiadu, chi su babu e sa mama sua l’aiat crèfidu peroe dutore in “agraria” o in “veterinaria”e tando aiat leadu sa laurea in Parma.
A sa fine fiat diventadu unu veterinàriu de balentìa manna pro sos animaleddos de domo: canes, batos etz., ma Giuanne fiat aduradu amantiosu de s’istòria, de sa limba sarda chi chistionait dae cando fiat nàschidu e de sas traditziones (teniat una colliduras de sas caratzas de sas màscheras de su carrasegare in Sardigna).
Cun sa polìtica, aiat incumentzadu dae giòvanu cun su Partidu Comunista e posca de annos meda de pasu dae sa polìtica, a pustis, in sos annos noranta, fiat torradu a sa polìtica “attiva” cun Forza Italia cun sa cale, pro pagos votos, non bi l’aiat fata a intrare in Regione comente consìgeri regionale; in sos ùrtimos annos, fiat passadu a su partidu “Unidos” de Mauro Pili.
Fiat istadu consigeri comunale in Sindia e posca in Macumere, fiat diventadu vitzesìndigu e assessore a sa cultura, faghindesi mudare sa delega in “assessore a su patrimòniu identitariu”; amantiosu de s’istòria aiat sustènnidu in su 2011, sos iscavos archeològicos in su giassu de su casteddu de Macumere.
Giuanne Biccai, fiat unu sustennidore mannu de su sardu e non solu a paràulas: in su mese de nadale 2009 aiat fatu deliberare a sa Giunta Comunale su topònimu ufìtziale de Macumere in sardu, posca l’aiat fatu deliberare dae su Consìgiu Comunale in su mese de cabidanni de su 2010; dae su 2011 a su 2014 aiat crèfidu chi s’ULS (Ufìtziu Limba Sarda) de sa Provìntzia de Nùgoro, intressit in sas atividades de sa Mustra de su Libru cun presentadas de libros in sardu e cun laboratòrios pro sos pitzinnos; in su 2013, aiat fatu deliberare su Consìgiu Comunale de Macumere, a favore de s’insinniamentu de su sardu in sas iscolas.
Leave a comment