Su 25 de freàrgiu, s’Ufìtziu regionale de s’Oms pro su Mediterràneu orientale (Emro) e s’Organizatzione panamericana de sa Salude (Paho) ant siglado in Su Càiru unu protocollu de intesa pro afortire sa seguresa e sa preparatzione de sas istruturas ospidaleras in casu de emergèntzias sanitàrias e disastros naturales. In un’època marcada dae instabilidades e dae risorsas limitadas, sa collaboratzione punnat a trasformare sos ospidales in pilastros comunitàrios a tretu de garantire curas sarvavida fintzas in cunditziones prus chi non crìticas. Sa dotora Hanan Balkhy, diretora regionale de s’Emro, at sutaliniadu s’urgèntzia de s’initziativa ammentende chi sa regione de su Mediterràneu orientale òspitat prus de sa metade de sas persones bisongiosas de assistèntzia umanitària a livellu globale e registrat su 40% de sos atacos mundiales a sas istruturas sanitàrias. «Afortire sa resilièntzia in custu cuntestu – narat Balkhy – est essentziale pro sarvare vidas e mantènnere sos servìtzios crìticos in tempos de crisi». S’acòrdiu previdet s’implementatzione de su “Resilient Hospitals Operational Framework”, un’istrategia operativa chi includet su tziclu intreu de sa gestione de s’arriscu. Custos sos obietivos: su de amparare sas infrastruturas; su de tutelare su personale sanitàriu; su de garantire fruniduras crìticas in antis, in intro e a pustis de sas emergèntzias. Su diretore Paho, su dotore Jarbas Barbosa, at evidentziadu comente s’unione de sas cumpetèntzias tècnicas at a permìtere de antitzipare e gestire sos corfos in antis chi si fùrrient a crisis irreversìbiles, capitalizende s’esperièntzia deghennale de s’organizatzione panamericana in contu de ospidales protègidos dae terremotos, uraganos e epidèmias. Sos meses imbenientes sa collaboratzione s’at a concretizare in formas de agiudu tècnicu indiritzadu a sos paisos, in valutatziones de sos arriscos e in formatziones miradas, pro chi sos ospidales abarrent una lìnia de amparu segura fintzas in sos cuntestos prus dìligos.
mauro piredda (immàgine)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment