Foto leada dae mancity.com
Sa Copa de Lega inglesa de fùbalu 2026 dd’at binta su Manchester City. In Wembley, in sa finale de domìniga 22, s’iscuadra de su nordovest de s’Inghilterra at bintu a s’Arsenal 2-0.
A pustis de unu primu tempus pagu interessante, dominadu dae sa tàtica e sena de atziones perigulosas, in sa ripresa su City at cumintzadu a giogare mègius e in 5 minutos, dae su 60’ a su 64’, at marcadu duas retes.
Su primu gol est arribadu dae traversone dae destra de Cherki: su difensore O’Reilly, aprofitende de una faddina de su portieri Kepa, at insacadu de conca.
Agiumai idèntica s’atzione de sa segunda marcadura. Dae un’atzione de s’ala manca Doku, chi at abertu a destra, sa botza est lòmpida a Matheus Nunes chi at torra artziadu pro sa conca de O’Reilly.
Pro su difensore de 21 annu (in sa foto), nàschidu in Manchester, tifosu de su City e crèschidu in su setore giovanile de su club, est istada una die de no ismentigare.
S’Arsenal at chircadu de torrare su corpu cun sos càmbios, ma sena de tènnere sorte. A su 78’ Calafiori cun unu tiru dae manca at leadu su palu e a su 88’ Gabriel Jesus, de conca, at leadu sa traversa.
Pro s’iscuadra de Manchester est sa de noe vitòrias in custu torneu creadu dae sa Lega de fùbalu in su 1960 e riservadu a totu sos club professionìsticos, a diferèntzia de sa Copa de Inghilterra, organizada dae sa Federatzione, chi est aberta a sos diletantes puru.
Guardiola duncas at bintu su disafiu tècnicu cun su connatzionale Arteta. Pro su catalanu de su City est sa de 4 vitòrias in sa copa. Su bascu de s’Arsenal, pro como, est primu in campionadu.
Manchester City: Trafford; Matheus Nunes, Khusanov, Aké, O’Reilly; Rodri, Bernardo Silva; Semenyo, Cherki (90’ Foden), Doku; Haaland. Tècnicu: Guardiola.
Arsenal: Kepa; White (82’ Gabriel Martinelli), Saliba, Gabriel Magalhaes, Hincapié (66’ Calafiori); Zubimendi, Rice; Saka, Havertz (66’ Havertz), Trossard (82’ Gabriel Jesus), Gyokeres. Tècnicu: Arteta.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment