Su 12 de austu de su 1708 un flota de navios de gherra inglesa aiat comintzadu a abbombiare sa tzitade de Casteddu dae su mare. Fiat unu fatu ligadu a sa gherra de sutzessione ispagnola chi aiat partzidu s’Europa intre sos partitàrios de sos de Borbone e de sos de s’Àustria. S’impresa l’aiat disinnada Fernandez de Sylva, conte de Cietefuentes, chi, in sa gherra de sutzessione ispagnola, faghiat parte de su partidu filo asbùrgicu. Càralu de Asburgo fiat de acordu e su re de Inghilterra aiat frunidu sos bateos armados. Su cumandu l’aiat leadu sir John Leake. In prus de sas tropas inglesas, b’aiat sordados e marineris arruolados in Bartzellona, portu dae su cale sa flota aiat mòvidu su 5 de austu cun su matessi Fernandez de Sylva in subra.
Cando sos vassellos si nche sunt presentados in cara a sa tzitade sa popolatzione aiat cominztadu dae luego a tìmere, ma isbarcada una rapresentàntzia de ambasciadores, sas autoridades locales, fideles galu a su Re de Ispagna, aiant refudadu de si rèndere. Tando fiat comintzadu su bombardamentu pro mustrare a sos sardos chi non b’aiat de brullare. Sas tropas filo asbùrgicas fiant isbarcadas in s’oru de Santu Elias. Si fiat pesadu in tzitade un’abolotu contra a su Visurè chi a sa fine aiat cajonadu sa bìnchida de sos aporridores a sos de Asburgo. Sas partes aiant firmadu un’armistìtziu e una resa sena cunditziones dae banda de su Regnu. Fernandez de Sylva l’aiant nominadu che a visurè nou.
Gasi fiat costadu pagas dies a pustis finas a S’Alighera e Casteddu Sardu. Pro more de sas bombas inglesas, su regnu de Sardigna aiat lassadu s’Ispagna pro fàghere sas partes a s’ereu de Àustria. In su 1713 su tratadu de Utrecht Rastad aiat ratificadu custu passàgiu.
Leave a comment