Artes martziales, su taekwondo.

– de Sarvadore Serra –

Su taekwondo (/ˌtaɪkwɒnˈdoʊ/, dae su coreanu 태권도, 跆拳道 [tʰɛ.k͈wʌn.do] (  ascurta)) est un’arte martziale coreana, caraterizada dae s’importu chi si dat a sos carches a s’artària de sa conca, a sos carches chi si dant brinchende e furriendeˑsi, e a sas tècnicas de dare sos carches in velotzidade.

Su taekwondo l’ant isvilupadu in sos annos 40 e 50 unos cantos gherradores coreanos cun esperièntzia in artes matziales  comente su  karate, sas artes martziales tzinesas, e unas cantas artes martziales coreanas traditzionales comente su  taekkyeon, su subak, e su gwonbeop.

Dae su 1945, pagu a pustis de s’agabbu de sa segunda gherra mundiale, unos cantos maistros ant abertu in Seul iscolas noas de artes martziales , sas kwan . Su tèrmine generale taekwondo traditzionale si riferit a sas artes martziales  praticadas dae sas  kwan in sos annos 40 e 50, mancari chi, a sas beras,  su tèrmine “taekwondo” no l’aerent galu imbentadu in cussu tempus, e cada  kwan tèngerat s’istile suo. In custa època su  taekwondo l’at adotadu fintzas s’ esèrtzitu sudcoreanu, chi at aumentadu sa popularidade sua in sas iscolas tziviles de artes martziales.

A pustis de àere bidu una mustra  de artes martziales  fata dae s’esèrtzitu in su  1952, su Presidente sudocoreanu Syngman Rhee at espressadu sa netzessidade chi sos istiles de sas  kwan s’esserent unificados. Dae su  1955 sos maistros de sas kwan  ant elaboradu un’istile ùnicu  chi si naraiat Tae Soo Do. Custu nùmene est formadu dae sas paràulas hanja 跆 tae “apeigare”, 手 su “manu” e 道 do “manera, disciplina“.

Choi Hong Hi (generale sudcoreanu e maistru de artes martziales) at amparadu s’impreu de su nùmene Tae Kwon Do, ponende, in càmbiu de su “manu”,  sa paràula  拳 kwon “pùngiu”, su tèrmine impitadu pro “artes martziales ” fintzas in  tzinesu (pinyin quán). Custa paràula noa, in su cumintzu,  no lis est agradada meda a sos maistros de sas  kwan. In su  1959 est nàschida sa  Korea Taekwondo Association (KTA) pro agiuare s’unificatzione de sas artes martziales coreanas. In su 1966, Choi si nch’est essidu dae sa KTA pro fundare sa  International Taekwon-Do Federation (ITF), finalizada a istitutzionalizare s’istile suo de  taekwondo.

Sa Gherra Frita de sos annos 60 e 70 at cumplicadu s’adotzione de s’ITF comente istile unificadu,  ca su guvernu sudcoreanu non cheriat influèntzias  nordcoreanas.  In su matessi tempus,  Choi Hong Hi chircaiat agiudu dae totue, fintzas dae sa Coea de su Nord. Tando, in su 1973, sa Corea de su Sud  no at dadu prus amparu a su  ITF,  chi at sighidu a operare comente federatzione indipendente, cun sa sede in Toronto, Canada; Choi at sighidu a isvilupare s’istile ITF,  finas a sa publicatzione, in su  1987,  de sa Encyclopedia of Taekwondo. A pustis chi  Choi s’est retiradu, su  ITF s’est ischirriadu in su  2001,  e torra  in su 2002,  pro formare tres federatziones separadas  chi in die de oe sighint a operare cun su matessi nùmene.

In su 1973 su Ministèriu de sa Cultura, Isport  e Turismu de sa Corea de su Sud at istituidu su Kukkiwon comente acadèmia natzionale noa pro su taekwondo. Su Kukkiwon como teniat medas de sas funtziones chi in antis teniat su KTA, in tèrmines de definitzione de un’istile unificadu  de taekwondo istabilidu a livellu guvernativu. In su matessi annu  su KTA e Kukkiwon ant amparadu s’istitutzione  de sa  World Taekwondo Federation pro promòvere su taekwondo in manera ispetzìfica  comente isport internatzionale. In sas garas WT impitant s’istile  Kukkiwon.

Dae su 2000, su taekwondo est una de sas duas artes martziales (s’àtera est su  judo) chi leant parte in sos Giogos Olìmpicos.

Si organizatziones comente ITF or Kukkiwon definint s’istile generale de su taekwondo, sas iscolas sìngulas  punnant a elaborare sas pràticas issoro

In s’Istadu italianu,  sa Sardigna tenet unu postu de importu in custu isport. In su 2018, pro sa de duas bortas a pustis de su 2016, ant seberadu Terranoa  pro fàghere sos campionados italianos. Los ant fatos dae  chenàbura  2 a domìniga 4 de martzu  in su Palaltogusto. B’ant leadu parte sas categorias  cadetos (sos chi sunt nàschidos intre su  2004 e su 2006) e junior (2001-2003),  chintòrgias nieddas  in sos cumbatimentos prus difìtziles. Una  cunfirma  importante pro su taekwondo sardu e  un’oportunidade manna pro totu sos atletas nostros, chi no ant dèpidu brincare su mare pro leare parte in sas garas.

Ligàmenes: https://en.wikipedia.org/wiki/Taekwondo

https://www.vistanet.it/2018/01/09/sardegna-capitale-italiana-del-taekwondo-secondo-anno-consecutivo-ospita-campionati-italiani/

http://www.taekwondoitalia.it/novita/primo-piano/1620-campionati-italiani-cadetti-e-junior-2018.html

Leave a comment