Sa poesia in limba sarda de Montanaru

-de Sarvadore Serra-

Antiogu Giosepe Casula, mègius connotu comente Montanaru (Dèsulu, 1878 – Dèsulu, 1957), est unu de sos mègius poetas in limba sarda.

Fìgiu de unu butegheri, at istudiadu fintzas a sos 16 annos, in antis in Casteddu e a pustis in su collègiu de Lanusè. Tando at lassadu s’iscola, at tentu un’esperièntzia curtza in sa Gherra de Abissìnia, e in fines s’est arroladu comente sutufitziale in sos Carabineris. L’ant dadu sa destinatzione in Sardigna e s’at giradu unas cantas biddas, cumintzende dae Tula.

Iscobertu dae su literadu Ranieri Ugo, e animadu dae issu, at cumintzadu a iscrìere pro sa “Piccola Rivista”, unu periòdicu literàriu de Casteddu fundadu e ghiadu dae Ugo matessi. In su 1904 at publicadu sa prima antologia sua: “Boghes de Barbàgia”, chi est essida cun sas figuras de Andrea Valli. Sa publicatzione de custa antologia e sos cuntatos, mancari ocasionales, cun sos àteros collaboradores de sa rivista, l’ant fatu connòschere àteros artistas de cussu tempus, fintzas de àteros campos; in Nùgoro at connotu a Bustianu Satta, a Giosepe Dessì e a Frantziscu Ciusa Romagna.

In su 1905 s’est cungedadu dae s’Arma ca, comente at naradu issu etotu, «Mi mancava il tempo di leggere e solo la mente era vigile durante le notti insonni trascorse assai spesso al lume delle stelle o sotto la bufera» (“Mi mancaiat su tempus de lèghere e petzi sa mente fiat abbista in sas notes sena sonnu coladas a s’ispissu in su lugore de sos isteddos o in sas traschias”) e est recuidu a Dèsulu, in ue at agatadu un’impreu in sa posta. At torradu a cumintzare a istudiare, s’at leadu sa lissèntzia magistrale e at cumintzadu a insinnare in Dèsulu, mantenende, però, su traballu in sa posta. S’est cojuadu una prima bia in su 1909, at imbiudadu, e s’est torradu a cojuare in su 1916. Pro unu de sos fìgios, Antoneddu, at iscritu “Ninna nanna de Anton’Istene”, una de sas poesias suas prus connotas.

At connotu in forma epistulare a Gràssia Deledda, e, in pessone, a Marianna Bussalai , intelletuale e militante sardista de gabbale.

In su 1921 at publicadu “Cantigos d’Ennargentu”, illustradu cun òperas de Filipu Figari. Su libru at tentu una resessida manna, no in Sardigna ebbia ma fintzas in Itàlia, e l’ant traduidu in italianu, inglesu frantzesu e tedescu.

In su 1925 a Montanaru l’ant seberadu pro rapresentare sa Sardigna in su “Congresso nazionale dei dialetti d’Italia” (Cungressu natzionale de sos dialetos de Itàlia) de Milanu. Ma in su 1928, comente est cumintzada sa campagna fascista de repressione de s’impreu de limbas no italianas (chi in Sardigna fiat peus de sas àteras partes de s’Istadu), nche l’ant postu in presone cun s’acusa de àere agiuadu unos cantos bandidos. Pustis l’ant liberadu innotzente, ma l’ant mantesu suta de osservatzione e l’ant minetzadu de nche lu mandare a su cunfinu.

In su 1933 at publicadu “Sos cantos de sa solitudine”, chi at tentu una resessida bona. Ma b’at nàschidu deretu una cuntierra cun su giornalista fascista Gino Anchisi. Custu, in antis, at naradu chi Montanaru, bravu comente fiat, depiat iscrìere in italianu, e no in sardu; pustis, sigomente su poeta no l’at postu mente, at pedidu su rispetu de sa lege chi imponiat s’impreu esclusivu de sa limba italiana; in fines at otentu sa tzensura de Montanaru dae sos giornales sardos, narende chi su poeta no l’aiat torradu imposta; imbetzes l’aiat rispostu, narende chi s’ischidada culturale de sa Sardigna podiat bènnere petzi dae su recùperu de sa limba materna. Custu e àteros fatos, però, no ant impedidu chi a su poeta l’apant fatu podestà de Dèsulu.

A pustis de sa gherra at aderidu a su partidu Sardu de Atzione, agatendeˑsi prus a curtzu a s’ala indipendentista.

At connotu sos poetas italianos Ada Negri e Giuseppe Ungaretti. At connotu a Pier Paolo Pasolini, chi in cussu tempus istudiaiat sa poesia in sas limbas romànicas. At connotu a Max Leopold Wagner, chi si fiat interessadu de sos traballos suos; ma, pro su chi s’istudiosu tedescu cheriat connòschere de sa poètica sarda, Montanaru l’at indiritzadu a su poeta nugoresu Frantzischinu Satta, connotu cando fiat maistru in Dèsulu.

In su 1950 at publicadu s’antologia “Sa Lantia”, chi però no est andada bene.

In su 1953 l’at bènnidu una paràlisi e pro unu pagu at sighidu a comunicare in versos cun sos àteros poetas, chi li naraiant “s’abile”. Ma in su 1955 s’est agravadu e nche l’ant dèpidu ghirare a Dèsulu, in ue s’at coladu su restu de sa vida in una poltrona. Si nch’est mortu duos annos a pustis.

A pustis de sa morte, su ghèneru Giuanninu Porcu at fatu publicare sas ùrtimas antologias suas, “Sas ultimas cantzones” e “Càntigos de amargura”.

Sa poesia de Montanaru, a parte sa fama chi at otentu in s’àtera ala de su mare, est istada populare a beru in s’ìsula. In pare cun sa de Pepinu Mereu, belle fedale ma mortu meda prus giòvanu, s’est incrarada a notoriedade immediada in su cumintzu de su Noighentos, su sèculu chi nche batiat a Sardigna sas cosas noas e chi faghiat connòschere in foras sa leva artìstica sarda noa.

Sa cuntierra cun Anchisi at giutu su poeta a bogare a craru sos cumbinchimentos suos subra de sa preferibilidade de s‘impreu de su sardu in càmbiu de s’italianu, comente elementu istruturale essentziale de sa defensa de sa cultura sarda. In sas annotatziones postas a costàgiu de “Sas ultimas canzones”, at iscritu chi sa limba sarda “ha la forza, la duttilità e la lucentezza del metallo e perciò balza viva come fresca polla dal cuore del popolo a cantare i dolori e le gioie, la forza e la speranza” (“tenet sa fortza, sa manivilidade e su lugore de su metallu e duncas brincat bia comente bena frisca dae su coro de su pòpulu pro cantare sos dolos e sas alligrias, sa fortza e s’isperu”).

ÒPERAS

Boghes de Barbagia, Casteddu, Dessì, 1904
Cantigos d’Ennargentu, Casteddu, Ledda, 1922
Sos cantos de sa solitudine, Casteddu, A.G.I.S., 1933
Sa lantia, Nuoro, Velox, 1950
Sas ultimas canzones, publicada pòstuma a incuru de Giuanninu Porcu (ghèneru de su poeta)
Cantigos de amargura, publicada pòstuma a incuru de Giuanninu Porcu

ANTOLOGIAS

Poesias, a incuru de F.Masala, Edizioni della Zattera, 1960.
Poesia dialettale del Novecento, a incuru de Mario Dell’Arco e Pier Paolo Pasolini, Guanda, Milanu, 1952
Il meglio della grande poesia in lingua sarda, a incuru de Mànliu Brigaglia e Mialinu Pira, Edizioni Della Torre, Casteddu, 1977
Montanaru. Poesie scelte, a incuru de Giuanninu Porcu, 3T, Casteddu, 1982

BIBLIOGRAFIA

Pier Paolo Pasolini, Introduzione, in Poesia dialettale del Novecento, Guanda, Milanu, 1952
Frantziscu Alziator, Storia della letteratura di Sardegna, Edizioni della Zattera, Casteddu, 1954
Maurìtziu Virdis, Alcune tracce per la delineazione della poetica di Antioco Casula (Montanaru), in Annali della Facoltà di lettere e filosofia, nuova serie, vol. I, Gallizzi, Sassari, 1980
Lenardu Sole, La poesia in lingua sarda del Novecento, in La Sardegna, a incuru de Mànliu Brigaglia, Edizioni Della Torre, Casteddu, 1982
Antonànghelu Liori, Giuanni Mameli, I segni dell’identità, Castello, Casteddu, 1984
Franco Brevini, Le parole perdute. Dialetti e poesia nel nostro secolo, Einaudi, Torino, 1990
Frantziscu Casula-Joyce Mattu, Montanaru, Alfa Editrice, Cuartu Sant’Aleni, 2008.
Frantziscu Casula, Uomini e donne di Sardegna, pagg.207-246, Alfa Editrice, Cuartu Sant’Aleni, 2010.
Frantziscu Casula,Letteratura e civiltà della Sardegna, vol.I, Grafica del Parteolla Editore, Dolianova, 2011, pagg.245-253.