de Antonimaria Pala
Autodeterminandende Sa rivolutzione cunservadora de su votu inùtile italianu no nos depet istesiare e imbassare s’atentu a s’àteru fronte continentale. Sa Catalunya proat sas fortzas de sa idea de autodeterminAtzione. Cussa non potet èssere, pro sa Sardigna autodetzisionista, petzi modellu de agregatzione de riferimentu, ma esperièntzia direta de una rivolutzione trancuilla in possa in custas oras. A medire cun seru e a banda de sa solidariedade simbòlica tocat. In cue si misurat sa reatzione de s’òrdine europeu mediadu dae sa violèntzia contrademocràtica de su rennu de Ispagna. S’analizu de su mudimine reu e sa censura de sa comunidade internatzionale e mescamente europea, nos faghet bisonzu pro so passos chi semus ponzende oe in die sos indipendentistas sardos. Punnare a unu modellu de fràigu in s’aunimentu natzionale nos imponet de pompiare cun interessu ativu a sos èsitos de un protzessu chi est fatu fatu prus a in antis de su chi semus movende inoghe, dende cara a s’ispinta reunionista involutiva de una casta de autonomismu mustrencu e pompiende cun severidade a su federatzionismu tardiu, chi galu depet merèssere, pro elaboratzione e reatzione a su dipendentismu istòricu sa fidùtzia chi petzi sas fainas annoadoras – cun ideas e pessones – e s’afianzu de custa terra natzione in caminu.
Leave a comment