– de Sarvadore Serra –
S’umanista Sigismondu Arquer fiat nàschidu in Casteddu in su 1530 dae una famìlia burghesa: su babbu fiat su giurista Giuanne Antoni Arquer, cussigeri capu de sa tzitade e collaboradore de su vitzerè Antonio de Cardona, semper in gherra con sos nòbiles sardos antispagnolos, chi fiant fintzas resessidos a nche lu pònnere in presone in su 1543.
Sigismondu si fiat laureadu in lege in Pisa in su 1547 e in teologia in Siena s’annu a pustis. In su 1548 at cumintzadu unu viàgiu pro perorare sa càusa de su babbu in sa corte de Bruxelles, ma s’est firmadu pro 5 meses in Isvìtzera, in su Cantone de sos Grigiones, in ue, in su 1549, at connotu sos religiosos italianos disterrados Pier Paolo Vergerio, Giulio della Rovere e Camillo Renato.
In antis l’at agasagiadu in Zurigu su riformadore Conrad Pellican (Pellicanus) (1478-1556), pustis, in Basilea, Bonifacio Amerbach (1495-1562). In Basilea l’at istrangiadu fintzas Celio Secondo Curione: in cue at iscritu sa “Sardiniae brevis historia et descriptio”, publicada in su 1550 comente capìtulu de su cumpèndiu famadu de geografia de su cartògrafu tedescu ex frantziscanu (coladu, in su 1529 a su luteranèsimu) Sebastian Münster (1488-1552), intituladu “Cosmographia universalis”, òpera posta a s’Ìnditze pro sas crìticas a su cleru catòlicu e a s’Incuisitzione e pro sos cumbinchimentos religiosos de s’autore.
Pustis, dae su 1551 a su 1555, est istadu in Ispagna. In custu tempus, re Felipe II (1556-1598), chi l’ammiraiat pro sa cultura funduda sua comente umanista e poeta, e pro su de èssere òmine de lege de gabale, l’at nominadu avocadu fiscale de Sardigna 
Belle gasi, cando est torradu a Casteddu in su 1555, s’est agatadu contra unu grustu de nòbiles sardos ghiados dae Sarvadore Aymerich. Sos inimigos suos paret chi apant proadu a l’abenenare. Pustis nche l’ant fatu pònnere in presone e l’ant fatu protzessare pro resones polìticas. Ma issu est resessidu a fuire e a nche fàghere tramudare su protzessu a Madrid. In cue l’ant liberadu innotzente, fintzas ca est intervènnidu su re. Est ghiradu a Sardigna in su 1558.
Tando sos inimigos l’ant incurpadu de eresia religiosa. Custu non fiat a beru ca, mancari aeret àpidu cuntatos cun unos cantos riformadores e cun sas ideas issoro, s’umanista sardu fiat abbarradu catòlicu. A dolu mannu suo, su de èssere ligadu a su nùmene de s’eresiarca Sebastian Münster l’at costadu s’acusa de luteranèsimu, dae sa cale, semper e cando, l’at assòlvidu in su 1560 s’archipìscamu e incuisidore in pessone, Antonio Parragues de Castillejo.
Belle gasi, Arquer si nch’est dèvidu tramudare a Ispagna pro s’isfrancare dae custos persighimentos contìnuos. Ma fintzas in cue s’Incuisitzione (e forsis fintzas Parragues) at sighidu a lu cunsiderare una pessone suspeta, fintzas a cando no l’at fatu arrestare in su 1563 cun un’acusa noa de luteranèsimu, in base a una sèrie de 8 lìteras cuncambiadas cun s’erasminianu ispagnolu (e ex alcade de Tàtari) Gaspar de Centelles, in ue Arquer, in mesu de s’àteru, esaltaiat sa letura e s’istùdiu diretu de sas Iscrituras Sacras contra a sas interpretatziones de sa Traditzione.
L’ant fatu unu protzessu longu a beru (7 annos) e l’ant torturadu, fintzas a sa sentèntzia finale de su 22 de nadale de su 1570, in ue l’ant cundennadu a brusiare in su fogu. Sa sentèntzia l’ant eseguida in Toledo 6 meses a pustis, su 4 de làmpadas de su 1571. Mancari l’esserent giai tochende sas framas, Arquer at proclamadu publicamente sa fide catòlica sua, e pro custu unu sordadu l’at còrfidu cun s’alabarda pro lu fàghere callare.
Su tempus chi est istadu presoneri at iscritu sas “Coplas al imagen del Crucifixo”, in ispagnolu, in ue est crara sa denùntzia de sas acuntèssidas tràgicas suas cun riferimentu a sas suferèntzias de sa Passione de Cristos. Dae su puntu de vista formale si insertant in su gènere ibèricu de sa “glosa”, chi sa finalidade fiat s’esègesi e sa paràfrasi de testos sacros. Dae su puntu de vista dotrinàriu sunt unu tentativu estremu de afirmare s’ortodossia sua.
Ligàmenes http://www.treccani.it/enciclopedia/sigismondo-arquer_(Dizionario-Biografico)/
http://www.sardegnacultura.it/j/v/253?s=20169&v=2&c=2679&c1=2732&t=1
http://www.arkadiaeditore.it/index.php?option=com_content&view=article&id=2546:sigismondo-arquer&catid=65:historica-paperbacks&Itemid=33
http://www.eresie.it/it/Arquer.htm
http://www.araldicasardegna.org/antenati/salvatore_aymerich_e_biblioteca.htm
Bibliografia: J.-B.-G. Galiffe, Le refuge ital. de Genève aux XVIème et XVIIème siècles, Genève 1881, p. 167; L. Manzi, S. A. geografo e storico del sec.XVI, Cagliari 1890; S. Lippi, Gli archivi di Spagna e la storia sarda,in La piccola rivista,I (Cagliari 1899), 5; D. Filia, La Sardegna cristiana,II,Sassari 1909, pp. 236 s.; E. Concas, La “Sardiniae brevis historia et descriptio“ di S. A.,in La regione,I (1923), pp. 55 e ss.; R. Di Tucci, L’arcivescovo Parragues e S. A., ibid, II(1924), 2; R. Ciasca, Bibliografia sarda, I,Roma 1931, p. 77; E. Concas, S. A. e la sua “Sardiniae brevis historia et descriptio“, in Mediterranea, VIII (1934), pp. 40-45; D. Scano, S. A., in Arch. stor. sardo, XIX (1935), pp. 3-137, XC; P. Leo, S. A. a Siena, in Studi sardi,V(1941), pp. 9-118; Id., Ancora su S. A., ibid.,VIII (1949), pp. 132 s.; G. Spini, Di Nicola Gallo e di alcune infiltrazioni in Sardegna della Riforma Protestante,in Rinascimento, II(1951), pp. 151-155; A. Dettori, Un’inedita passione fra le carte di S.A., Cagliari 1956.
Leave a comment