de Sarvadore Serra
In istiu faghimus a manera chi no intret tropu sole dae sas ventanas. In ierru faghimus su contràriu. Como ant bogadu a campu una casta de ventana intelligente chi si cumportat cunforma a su tempus. L’at imbentada unu grupu de istudiosos de s’Universidade de Princeton chi at presentadu s’ istùdiu suo in sa revista “Nature Energy”.
Su grupu, ghiadu dae s’istudiosa Yueh-Lynn Loo, at creadu una casta noa de pellìcula solare cun duas caraterìsticas chi podent cambiare sos paradigmas de rispàrmiu energèticu in sas domos: sunt trasparentes e s’alimentant cun s’energia solare; duncas non b’at bisòngiu de pònnere perunu impiantu. Sos chi ant bogadu a pìgiu custu imbentu ant impitadu semicundutores orgànicos pro fàghere tzèllulas solares capassas de otènnere una càrriga elètrica de energia solare chi resessit a colorare belle de su totu una pellìcula chi si ponet in su bidru. S’obietivu est craru: fàghere a manera chi su bidru lasset colare de prus o prus pagu sa lughe de su sole, cunforma a sa netzessidade de su mamentu, lompende a un’opatzidade de su 80%. In àteras paràulas, si tratat de una pellìcula aderente chi cadaunu podet installare in sas ventanas e podet gestire cun unu telèfonu intelligente pro fàghere prus iscura o prus crara sa ventana in funtzione de sa netzessidade. Ma sa cosa prus interessante de custu progetu est chi si podet otènnere unu produtu chi costat pagu e cun una difusione manna in su mercadu. “S’impreu de sos rajos ultravioletos in custa ventana at a fàghere minimare meda su costu de s’installatzione e at a fàghere aumentare meda sa funtzionalidade energètica”, narat Lynn-Loo.
Custas ventanas inteligentes non solu ant a permìtere unu rispàrmiu energèticu a curtzu a su 40% (cunforma a sas previsiones de sos istudiosos), ma, gràtzias a s’energia chi sobrat, ant a servire fintzas pro alimentare dispositivos minores in sa domo. Pro custa resone, un’impresa fundada dae sa diretora matessi de su progetu, “Andluca Technologies”, s’at a incarrigare de agatare sas aplicatziones cumertziales de su produtu. Sa dita assegurat chi at a superare in custa manera sos “disafios tecnològicos”, comente lis narat Lynn-Loo, chi impedint chi sas ventanas siant giai unu produtu cumertzializàbile.
Ma petzi in sas domos l’ant a aplicare custa tecnologia noa? Sas ventaneddas de sas màchinas podent èssere unu nitzu potentziale de su produtu, e sunt istudiende sa possibilidade de alimentare sa climatizatzione de una vetura in su sole faghende minimare sa temperadura interna.
Ligàmenes:
https://www.princeton.edu/news/2017/06/30/self-powered-system-makes-smart-windows-smarter
https://elpais.com/tecnologia/2017/07/05/actualidad/1499255997_970093.html
Leave a comment