Sos Apache, vìtimas de sos invasores

     – de Sarvadore Serra –

Sos Apache sunt unu grupu de tribù nativas americanas   chi tenent ligàmenes culturales astrintos.  Su territòriu issoro traditzionale fiat in Arizona Orientale, Mèssicu Setentrionale (Sonora e Chihuahua),  Mèssicu Nou, Texas Otzidentale e Colorado Meridionale,   e  fiat formadu dae montes artos, baddes reparadas e prenas de rios, canyon fundudos, desertos.

Sos Apache ant gherradu pro sèculos contra a sos invasores, a sa prima contra a sos ispagnolos. Su primu atacu issoro, contra a  Sonora,  b’est istadu in s’agabbu de su sèculu XVII.  Pustis,  in su sèculu XIX, bi sun istadas sas gherras indianu-americanas , e s’ esèrtzitu de sos Istados Unidos  s’est abbigiadu de cantu sos Apache esserent gherreris de valore e  istrategas de gabbale.

Sos grupos Apache, in custa era postcoloniale, sunt partzidos in  Apache Otzidentales, Chiricahua, Mescalero, Jicarilla, Lipan, e  Apache de sos Pranos (connotos fintzas comente Kiowa-Apache). B’at grupos chi istant  in Oklahoma e Texas in sas reservas de Arizona e Mèssicu Nou. Ma b’at Apache  in totu su territòriu de sos Istadios Unidos.

In generale, sos colonos ispagnolos chi si istabiliant in biddas e sos grupos Apache  ant isvilupadu pro sèculos unu modellu alternadu de interatzione. A bortas si gherraiant e a bortas cumertziaiant. Sos documentos de cussu tempus  mustrant chi sas relatziones  dipendiant dae sas biddas ispagnolas  e dae sos grupos Apache chi intraiant in cuntatu. Pro nàrrere, unu grupu podiat èssere in amigàntzia cun una bidda e fàghere sa gherra a un’àtera. Cando iscopiaiat una gherra, sos ispagnolos imbiaiant sas tropas issoro, a pustis de una batalla ambas partes  “firmaiant unu tratadu,” e totus ghiraiant a domo.

Custas relatziones intritzidas de gherras e alliàntzias ant sighidu cun s’indipendèntzia de su  Mèssicu in su  1821. Sa situatzione at peoradu in su  1835, cando su  Mèssicu at postu una tàglia in sos iscalpos de sos Apache, chi teniant petzi sa curpa de difèndere sos interessos issoro. Cando Juan José Compà, su capu de sos Mimbreño Apaches de sas Minas de Ràmene, l’ant mortu pro su dinare de una tàglia in su  1837, Mangas Coloradas (Mànigas Rujas) o Dasoda-hae (Est sèidu pròpiu in cue) est devènnidu capu e cumandante militare; in su matessi  annu a  Soldado Fiero (aka Fuerte), capu de sos Mimbreño Apaches de Warm Springs l’ant mortu sos sordados messicanos a curtzu a Janos, e su fìgiu Cuchillo Negro (Leputzu Nieddu) est devènnidu capu e cumandante militare. Sos indianos (cun Mangas Coloradas primu capu  e Cuchillo Negro segundu capu  de totu su pòpulu Tchihende o Mimbreño) ant cunduidu una sèrie de rapresàllias  contra a sos messicanos. In su 1856  sas autoridades  de s’Istadu de  Durango ant naradu chi in sos ùrtimos 20 annos sos gherreris indianos  (mescamente Comanche e Apache) aiant mortu unas  6.000 pessones, nd’aiant secuestradu  748, e aiant incausadu s’abbandonu de  358 insediamentos.

Cando sos Istados Unidos ant cumintzadu sa gherra cun su Mèssicu, in su 1846, medas grupos Apache ant promissu a sos sordados de sos Istados Unidos  de los lassare colare in sas terras issoro. Cando sos americanos, in su 1846, ant reclamadu parte de sos territòrios  de su  Mèssicu, Mangas Coloradas at firmadu unu tratadu de paghe cun issos, respetendeˑlos comente cunchistadores de cussa parte de  terra messicana. Sa paghe intre sos Apache e sos Istados Unidos at duradu fintzas a sos annos 50,  cando un’aflussu de chircadores de oro  in sos  Montes de Santa Rita nch’at giutu a unu cunflitu cun sos Apache. Gasi est cumintzada s’ època chi li narant de sas  Gherras Apache. S’est tratadu de una sèrie de cunflitos armados chi bi sunt istados in su Sud Ovest dae su 1849 a su 1886, mancari sas ostilidades non siant agabbadas de su totu si no in su  1924. Geronimo, chi faghiat parte de su grupu Chiricahua , est de seguru su gherreri Apache prus famadu de s’època. Sa gherra, comente ischint totus, l’at binta s’esèrtzitu de sos Istados Unidos, e a sos indianos los ant acorrados in sas reservas.

Su cuntzetu de reserva  est pròpiu un’imbentu americanu,  ca non b’aiant pensadu nen sos ispagnolos nen sos messicanos. Sas reservas, a s’ispissu, fiant guvernadas male, e grupos chi non teniant peruna relatzione de parentiu fiant custrintos a istare in pare. Non b’aiat tancaduras pro mantènnere sa gente in intro o in  foras. Podiat acuntèssere chi a unu grupu li daiant su permissu de si nch’andare pro unu pagu de tempus. A bortas  unu grupu si nch’andaiat sena permissu, pro fàghere bardanas, pro torrare a logu suo in chirca de màndigu, o petzi pro si nch’istesiare. Sos militares a su sòlitu teniant casermas a curtzu,  cun s’incàrrigu de mantènnere sos indianos in sas reservas,  chirchende de faghende torrare sos chi si nche fiant andados. Custa polìtica segregatzionista de sos Istados Unidos  at incausadu, nessi pro àteros 25 annos,  cunflitos e gherras cun sos grupos de Apache  chi si nch’andaiant dae  sas reservas .

S’istadu de gherra intre sos Apache e sos euroamericanos nch’at giutu a una visione istereotipada  de unos cantos elementos de sa cultura indìgena,  comente at notadu s’ antropòlogu Keith Basso: “De sas chentinas de pòpulos nativos de su Nord America, pagos sunt istados rapresentados gasi male  comente sos Apache de  Arizona e de su Mèssicu Nou. Glorificada dae sos romanzieris, sensatzionalizada dae sos istòricos, e distorsionada  prus in gasi de sa credulidade  dae sos produtores de pellìculas cumertziales, s’imàgine populare de  ‘s’Apache’ — un’èssere semi-umanu brutale e terrorosu, chi punnat a sa morte e  a sa distrutzione sena resone — est belle totu su produtu  de una descritzione irresponsàbile  e esagerada. B’at pagu dudas  chi s’ Apache l’ant  trasformadu dae nativu americanu  a legenda americana, e est sa creatzione fantasiosa e farsa  de tzitadinos no indianos  chi s’inabilidade issoro  a reconnòschere  sa traitoria manna a beru de istereòtipos ètnicos e culturales est istada binta petzi dae sa voluntade  de los alimentare  e de los fàghere crèschere”.  

In su 1875, s’esèrtzitu americanu at detzisu sa deportatzione  de unos  1500 Yavapai e Dilzhe’e Apache (mègius connotes comente Tonto Apache) dae sa reserva de  Rio Verde formada dae mìgias de acros de terrinos  chi lis aiat promissu su guvernu de sos Istados Unidos. A sos òrdines de su cummissàriu indianu  L.E. Dudley, U.S.,  sas tropas de s’esèrtzitu ant  cuntrintu sa gente, giòvanos e antzianos, a rugrare rios prenos de abba in ierru, ghennas de monte e canyon astrintos  pro lòmpere a s’Agentzia Indiana  de  San Carlos, a 180 mìllias (290 chilòmetros) de distàntzia. In custa caminada b’at mortu chentinas de pessones. Sa gente nche l’ant acorrada pro 25 annos,  in s’ìnteri chi sos colonos si nche leaiant sas terras issoro. Petzi pagas chentinas e pessones ant pòdidu torrare a domo.

Medas crònacas istòricas narant chi sa derrota finale de sos Apache  b’est istada cando  5.000 sordados ant custrintu su grupu de  Geronimo formadu dae 30 – 50 òmines, fèminas e pitzinnos a s’arrèndere su 4 de cabudanni  su 1886 in  Skeleton Canyon, Arizona. S’esèrtzitu nche los at mandados in cunfinu militare a Florida in Fort Pickens e, pustis, Ft. Sill, Oklahoma.

Ant iscritu libros medas subra de sas gherras de sos Apache  e su fallimentu de sos tratados cun americanos e messicanos. In s’era  post –gherra, su guvernu de sos Istados Unidos at mandadu a dae in antis programas de assimilatzione ètnica, leende sos pitzinnos Apache dae sa famìlias issoro e faghendeˑlos adotare dae biancos americanos Custas pràticas sunt istadas sìmiles a sas chi ant interessadu sas Generatziones Furadas de Austràlia. Custa at a abbarrare pro semper una de sas birgòngias prus mannas  de un’Istadu chi si bantat de èssere democràticu.

Ligàmenes: https://en.wikipedia.org/wiki/Apache

https://es.wikipedia.org/wiki/Apache

https://it.wikipedia.org/wiki/Apache

Leave a comment