de Sarvadore Serra
Sos Sioux /ˈsuː/ sunt unu pòpulu nativu de su Nord America. Su tèrmine si riferit siat a sos grupos ètnicos de sa Natzione Sioux , siat a sos dialetos chi in custa natzione si faeddant. Sos Sioux sunt partzidos in tres grupos mannos currispondentes a tres grupos linguìsticos: Dakota, Lakota, e Nakota.
Sos Santee Dakotas (Isáŋyathi; “Leputzu”) istant in s’oriente estremu de sos Dakotas, Minnesota e Iowa setentrionale. Sos Yankton e sos Yanktonai Dakotas (Iháŋktȟuŋwaŋ and Iháŋktȟuŋwaŋna; “Bidda-in-s’agabbu” e “Bidditzolu-in-s’agabbu”), chi lis narant fintzas Wičhíyena, istant in su tretu de su riu Minnesota. Sos Nakotas sunt sos Assiniboine e Stoney de su Canadà Otzidentale e de su Montana. Sos Lakotas, chi lis narant fintzas Teton (Thítȟuŋwaŋ; “Abitadores de sa prateria”), sunt sos Sioux otzidentales, connotos comente cassadores e gherreris.
Oe in die, sos Sioux tenent guvernos tribales diferentes isparghinados in unas cantas comunidades in Nord Dakota, Sud Dakota, Nebraska, Minnesota, Montana (in sos Istados Unidos), e Manitoba e Sud Saskatchewan in Canadà.
Su nùmene “Sioux” l’aiant leadu sos inglesos, in sos annos 60 de su 700, dae su frantzesu. Est s’incurtziadura de Nadouessioux, chi a primu l’at atestadu Jean Nicolet in su 1640.
Unas cantas tribù ant adotadu, in manera formale o informale, sos nùmenes traditzionales: sa “Rosebud Sioux Tribe” est connota fintzas comente Sičháŋǧu Oyáte, e sos Oglala impitant a s’ispissu su nùmene Oglála Lakȟóta Oyáte, in càmbiu de s’inglesu “Oglala Sioux Tribe” or OST. 
Sos istòricos Sioux a sa Natzione Sioux li narant fintzas “Očhéthi Šakówiŋ” (si pronùntziat [oˈtʃʰetʰi ʃaˈkowĩ]): cheret nàrrere “Sete Cussìgios de Foghile”. Cada foghile fiat su sìmbulu de unu “oyate” (pòpulatzione). Sas sete populatziones chi formant sos Sioux sunt: Bdewákaŋthuŋwaŋ (Mdewakanton), Waȟpéthuŋwaŋ (Wahpeton), Waȟpékhute (Wahpekute), Sisíthuŋwaŋ (Sisseton), Iháŋkthuŋwaŋ (Yankton), Iháŋkthuŋwaŋna (Yanktonai), e Thítȟuŋwaŋ (Teton or Lakota). Sos sete Cussìgios de Foghile si reuniant cada istiu pro leare detzisiones, rennovare alliàntzias, arresonare de chistiones tribales, e leare parte in sa Dantza de su Sole. Sos Sete Cussìgios sèberaiant 4 cumandantes, connotos comente Wičháša Yatápika, in mesu de sos capos de cada Cussìgiu. S’ùrtima reunione de sos Cussìgios b’est istada in su 1850.
Sos primos cuntatos cun sos europeos
Sos Dakotas in su sèculu XVII istaiant a curtzu a sa bena de su Mississippi. Dae su 1700 calicunu si nch’est tramudadu a su chi oe est su Sud Dakota. A ùrtimos de su sèculu XVII sos Dakotas ant fatu un’alliàntzia cun sos mercantes frantzesos. Sos frantzesos fiant in chirca de otènnere profetu dae sa gherra pro su mercadu de sas peddes contra a sos inglesos, chi aiant fundadu dae pagu sa Hudson’s Bay Company.
Sas relatziones cun sos frantzesos
Su primu addòviu documentadu intre sos sioux e sos frantzesos b’est istadu cando sos esploradores e cummertziantes de peddes Radisson e Groseilliers sunt lòmpidos a su chi oe est su Wisconsin in s’ierru 1659-60. A pustis issoro bi nd’at andadu medas àteros. In su 1736 unu grupu de Sioux at mortu a Jean Baptiste de La Vérendrye, unu de sos fundadores de sa provìntzia de Manitoba, e àteros 20 òmines in un’ìsula de Lake of the Woods. Belle gasi, su cummèrtziu cun sos frantzesos at sighidu fintzas a cando custos non si nche sunt andados dae su Nord Amèrica in su 1763.
Sas relatziones cun sos Pawnees.
In s’ìnteri non mancaiant sas gherras intre sos nativos americanos. S’istòricu Mark van de Logt at iscritu: “Mancari sos istòricos chi si òcupant de gherras a su sòlitu riservent su cuntzetu de “gherra totale” a sos cunflitos intre natziones industriales modernas, custu tèrmine si podet aplicare a sos raportos intre sos pawnees a un’ala e sos sioux e cheyennes a s’àtera. Ambas duas partes dirigiant sas atziones issoro non contra a sos gherreris ebbia, ma fintzas contra a sas populatziones. Sos tziviles fiant obietivos legìtimos. Est in custu cuntestu chi cheret bidu su servìtziu militare de sos Pawnee Scouts , chi ant gherradu cun s’esèrtzitu istatunitensu contra a sos àteros nativos.”
Sas gherras de s’otighentos
Su sèculu XIX est istadu caraterizados dae cunflitos cun s’esèrtzitu de sos Istados Unidos. B’at de ammentare sa Gherra Dakota de su 1862, sa Gherra de sa Nue Ruja, sa Gherra Manna Sioux de su 1876. S’ùrtima est su Massacru de Wounded Knee Creek, unu cunflitu mannu intre sos Lakotas e sos Istados Unidos. Est istadu descritu comente “massacre” dae su generale Nelson A. Miles in una lìtera a su Cummissàriu de sos Afares Indianos. Su 29 de nadale de su 1890, 500 sordados de su 7th Cavalry Regiment, agiuados dae Hotchkiss guns (unu petzu de artillieria lèbia capatza de fogu ràpidu), ant inghiriadu un’acampamentu de sos Lakotas de Miniconjou e Hunkpapa cun s’òrdine de los iscortare fintzas a sa ferruvia pro nche los giùghere a Omaha, Nebraska. B’at àpidu un’isparatòriu, e cando est agabbadu sunt abbarrados mortos in terra 25 sordados e prus de 150 Lakota Sioux, òmines, fèminas e pitzinnnos. Non s’ischit cale parte est istada responsàbile de su primu corfu; si pensat chi carchi sordadu siat istadu vìtima de “fogu amigu” ca isparaiant a buca de cannone in cunditziones caòticas.
Sa nàschida de sas riservas
In s’ùrtima parte de su sèculu XIX, sos biancos ant detzisu de fraigare ferruvias e custas ferruvias deviant colare in sos terrinos de sos indianos. Tando sas cumpangias ant assuntu cassadores pro isterminare sos bisontes, chi fiant sa resursa printzipale de màndigu pro sos indianos. Sos Dakotas and Lakotas sunt istados custrintos a atzetare de istare in sas riservas ammaniadas pro issos dae su guvernu de sos Istados Unidos; duncas ant abbandonadu s’economia issoro basada in sa cassa e in su nomadismu e ant cumintzadu a pesare bestiàmene domesticu e a cultivare sas terras; in sos primos annos de s’Era de sas Riservas, su pòpulu Sioux dipendiat pro supravìvere dae pagamentos federales annuales garantidos dae tratados.
In Minnesota, sos tratados de Traverse des Sioux e Mendota in su 1851 ant lassadu a sos Dakotas una riserva de 20 mìlias (32 chilòmetros) in cada oru de su riu Minnesota.
Oe in die, su mesu de sos Sioux “registrados” in sos Istados Unidos istant in foras de sas riservas. “Registradu” cheret nàrrere chie tenet nessi unu cuartu de sàmbene sioux (s’ecuivalente de unu giaju).
In Canadà, su guvernu reconnoschet a sa comunidade tribale su status de Primas Natziones (sos aborìgenos canadesos chi non sunt ne inuit nen metis). Sos possidimentos de custas Primas Natziones si narant Riservas indianas.
S’ativismu intre sos sèculos XX e XXI
Dae s’agabbu de sos annos 60 de su 900 , sos nativos Americanos giòvanos ant cumintzadu a gherrare 
pro megiorare sas cunditziones issoro, pro su rispetu de sos deretos tziviles e pro otènnere programas mègius in contu de istrutzione e isvilupu econòmicu. Duncas b’at àpidu protestas medas, comente s’ ocupatzione de s’Ìsula de Alcatraz in Califòrnia.
Sos fatos de Wounded Knee sunt cumintzados su 27 de freàrgiu de su 1973 cando sos sighidores de su Movimentu Indianu Americanu ant assediadu sa tzitade de Wounded Knee, Sud Dakota Sos ocupantes ant controlladu sa tzitade pro 71 dies suta de sos ogros de su Federal Bureau of Investigation e de su United States Marshals Service. In sas dies de s’ocupatzione a duos membros de su Movimentu los ant mortos a balla.
Sa Lakota Freedom Delegation (Delegatzione pro sa Libertade Lakota), unu grupu de ativistas nativos americanos, at decraradu, su 29 de nadale de su 2007, chi sos Lakotas fiant iscontzende totu sos tratados firmados cun sos Istados Unidos, cun sa finalidade de otènnere sa soverania. Unu de sos ativistas, Russell Means, at naradu chi s’atzione est legale, e at mentovadu sa lege naturale, sa legislatzione internatzionale e sa legislatzione de sos Istados Unidos. A pàrrere de su grupu, Lakota est una natzione soverana, mancari non siat galu reconnota comente Istadu. Issos cherent, comente territòriu de s’Istadu issoro, mìgias de chilòmetros cuadrados in Nord e Sud Dakota, Wyoming, Nebraska e Montana.
In su 2014 unu grupu Lakota at bogadu a campu MazaCoin, una moneda digitale chi pro issos est sa “moneda natzionale de sa Natzione Lakota “.
In s’istiu de su 2016, sos Sioux de sa riserva de Standing Rock ant cumintzadu una protesta contra a su fràigu de s’oleodutu de Dakota Access, connotu fintzas comente oleodutu de Bakken, chi, si lu realizant, diat trasportare petròliu pessurizadu dae sos putzos de Bakken de su Nord Dakota fintzas a su depòsitu e nodu de trasferimentu de Patoka, Illinois. S’oleodutu diat colare petzi a mesu mìliu de distàntzia dae sa riserva e suta de su riu Mississipi, creende problemas mannos pro sa furnidura de abba e faghende dannu mannu a s’ambiente.
In pagas paràulas, nudda est cambiadu da s’otighentos: sos nativos americanos devent galu gherrare pro difèndere sa vida, sa libertade e s’economia issoro contra a sa gana de balàngiu de sos biancos.
Ligàmene: htt//en.wikipedia.org/wiki/Sioux
Leave a comment