-de Sarvadore Serra-
Sa limba istandard tzinesa est connota fintzas comente mandarinu modernu istandard o mandarinu istandard. Li narant puru putonghua, guoyu o petzi mandarinu. Est s’ùnica limba ufitziale de Tzina e de Taiwan. Est una de sas bator limbas ufitziales de Singapore. Sa pronùntzia de s’istandard est basada in su dialetu de Pechinu. Su vocabulàriu est leadu dae sos dialetos mandarinos. Sa gramàtica est basada in sa literadura de su vernaculare iscritu modernu.
Comente sas àteras variedades de tzinesu, su tzinesu istandard est una limba tonale. Tenet prus cunsonantes initziales ma prus pagas vocales, cunsonantes finales e intonatziones de sas àteras variedades. Su tzinesu istandard est una limba analìtica, mancari cun medas paràulas cumpostas. Comente sas àteras variedades de tzinesu est una limba a sugetu dominante e tenet s’òrdine sugetu–verbu–ogetu .
B’at duas maneras istandardizadas de iscrìere sa limba: su putonghua in sa Tzina continentale e su guoyu in Taiwan. Su putonghua l’iscrient impitende caràteres tzinesos simplificados; su guoyu l’iscrient impitende caràteres tzinesos traditzionales. B’at caràteres medas chi sunt idènticos in sos duos sistemas.
In limba tzinesa, sa variedade istandard est connota comente:
-
Pǔtōnghuà (普通话; 普通話; “limba comuna”) in sa Repùblica Populare Tzinesa, Hong Kong, e Macau;
-
Guóyǔ (國語; “limba natzionale”) in Taiwan;
-
Huáyǔ (华语; 華語; “limba tzinesa “) in sas Filipinas, Singapore, Malèsia, e su restu de s’ Àsia Sudorientale;
-
Hànyǔ (汉语; 漢語; “limba de sa tribù Han “) in sos Istados Unidos e in totue in sa diàspora tzinesa.
In limba inglesa, sos guvernos of Tzina e Hong Kong impitant sos tèrmines “putonghua”, “putonghua chinese”, “mandarin chinese” e “mandarin”, cando chi sos de Taiwan, Singapore e Malèsia, impitant petzi “mandarin”.
Su tèrmine guoyu l’aiant impitadu in antis sos guvernantes no-Han de Tzina pro si referire a sos limbàgios issoro, ma in su 1909 su ministèriu de s’istrutzione Qing at detzìdidu in manera ufitziale de impitare custu tèrmine pro su mandarinu, una lingua franca basada in sas variedades tzinesas setentrionales, proclamendeˑlu sa “limba natzionale” noa.
Su tèrmine “mandarinu” est una tradutzione de guānhuà (官话/官話, literalmente “discursu de s’ufitziale”), chi si riferiat a sa lingua franca de s’ùrtimu impèriu tzinesu. Su tèrmine tzinesu est obsoletu pro èssere su nùmene de sa limba istandard, ma l’impitant sos linguistas pro si riferire a su grupu prus mannu de dialetos mandarinos faeddados comente limba materna in su prus de sa Tzina setentrionale e sudotzidentale
In inglesu, “mandarinu” si riferit a sa limba istandard, su grupu de dialetos in su cumplessu, formas istòricas comente s’ùrtima lingua franca de s’Impèriu. Su nùmene “mandarinu istandard modernu ” l’impitant, a bias, sos linguistas chi cherent distìnghere s’istadu atuale de sa limba cumpatzida dae àteros dialetos setentrionale e istòricos .
Dae su puntu de vista de s’ufitzialidade, su tzinesu istandard tenet sa funtzione de una lingua franca — dare a sos chi faeddant sas variedades diferentes de tzinesu, e gasi etotu a sas minorias tzinesas, sa possibilidade de comunicare a pare. Su nùmene putonghua, est a nàrrere “limbàgiu comunu,” afortit custa idea.
Siat in Tzina siat in Taiwan, s’impreu de su mandarinu comente mèdiu de istrutzione in su sistema educativu e in sos mèdios de informatzione at agiuadu sa difusione de custa modalidade linguìstica. Comente resurtadu, gente meda su mandarinu lu faeddat sena problemas, mancari a s’ispissu cun carchi variatzione regionale o personale in tèrmines de pronùntzia o lèssicu, siat in sa Tzina continentale siat in Taiwan. In su 2014, su Ministèriu de s’Istrutzione at carculadu chi pagu prus o mancu su 70% de sa populatzione est a tretu de faeddare su mandarinu.
Siat in sa Tzina continentale siat in Taiwan impitant su tzinesu istandard in sos cuntestos ufitziales e sos guvernos nde promovent s’impreu comente lingua franca natzionale.
Su tzinesu istandard l’impitant a su sòlitu pro resone pràticas, ca, in partes medas de Tzina, sa diferèntzia linguìstica est gasi manna chi sos chi istant in tzitades a curtzu diant pòdere tènnere dificurtades a comunicare a pare sena sena lingua franca.
Su mandarinu, oe, s’est ispainende a s’àtera de su mare. In New York , s’impreu de sa variante cantonesa chi at dominadu Manhattan Chinatown pro deghinas de annos est benende mancu in favore de su mandarinu, sa limba comuna de su prus de sos ùrtimos migrantes tzinesos.
Ma, comente funtzionat su sistema educativu?
Siat in sa Tzina continentale, siat in Taiwan, su tzinesu istandard l’insinnant dae s’iscola elementare cun su sistema de s‘immersione. A pustis de su segundu gradu, totu su sistema educativu est in tzinesu istandard.
Cun s’isvilupu lestru de s’economia e s’aumentu mannu de sa migratzione interna in Tzina, su Putonghua Proficiency Test est devènnidu deretu populare meda e medas laureados faghent custu esàmene in antis de chircare unu traballu.
Ligàmene: https://en.wikipedia.org/wiki/Standard_Chinese
Leave a comment