– de Giuseppe Corronca –
Gottfried Wilhelm Leibniz naschet a Lipsia in s’annu 1646 e morit in Hannover in s’annu 1716. S’est ocupadu de matemàtica e de fìsica aprofundende sa connoschèntzia de sa filosofia de Cartèsiu.
In s’annu 1676 iscoberret su càlculu integrale o infinitesimale chi fiat istadu giai teorizadu unos cantos deghe annos in antis dae Newton, ma Leibniz lòmpet a custu resurtu in manera indipendente dae Newton.
Intre sas òperas suas prus de importu ammentamus su Discursu de metafìsica (1686) e Monadologia (1714).
In sa prima òpera Leibniz afirmat chi bi est un òrdine netzessàriu chi no est determinadu e, duncas, est lìberu e contingente. Sa netzessidade, pro Leibniz, est possìbile in su mundu de sa lògica, ma no in sa realidade. Issu faghet una distintzione intre beridades de resone e beridades de fatu. Sas primas sunt netzessàrias e sunt fundadas subra sos printzìpios de identidade (una cosa est uguale a issa matessi) e de non-contraditzione (una propositzione est bera o non-bera).
Custas beridades sunt possìbiles, non podent bènnere dae s’esperièntzia e, duncas, sunt innatas. Sas segundas sunt beridades contingentes e pertocant sa realidade efetiva, duncas su contràriu issoro est possìbile e si fundant subra su printzìpiu de resone sufitziente, chi narat chi nudda si verìficat sena una resone sufitziente. Pro more de custu printzìpiu, Leibniz, fòrmulat su cuntzetu de sustàntzia individuale, chi est su sugetu reale chi giughet sa resone sufitziente de su predicadu suo.
Pro su chi pertocat sa fìsica, duas cosas tocat ammentare. Pro Leibniz sa matèria est divisìbile a s’infinidu e non si firmat a elementos indivisìbiles, chi sunt sos àtomos.
Sa segunda cosa est chi s’elementu originàriu de su mundu fìsicu, non est s’estensione o su movimentu, comente cheriat Cartèsiu, ma est sa fortza bia, chi est uguale a su prodotu de sa massa pro sa velotzidade: m·v2. Sa fortza est, pro Leibniz, unu cuntzetu metafìsicu chi fundat sas leges de sa fìsica; issu negat su dualismu cartesianu de res cogitans e res extensa e ponet sa fortza comente ùnicu printzìpiu. Duncas, dae su puntu de annotu filosòficu, est monista.
Cun s’introduida de su cuntzetu de mònade, cheret unire su mundu fìsicu e su mundu ispirituale in unu òrdine universale lìberu. Sa mònade est definida comente un atomu ispirituale, eterna, simple, sena estensione chi non comùnicat cun àteras mònades. Non bi sunt in natura duas mònades idènticas. Pro agatare una solutzione a su raportu intre sas mònades, Leibniz teorizat sa dotrina de s’armonia pre-istabilida: sas mònades ant una armonia istabilida innantis dae Deus in s’atu de sa creatzione.
Si sa dotrina de Spinoza est istada una filosofia de s’òrdine geomètricu de su mundu, sa dotrina de Leibniz, puru si afirmat chi esistit s’òrdine de su mundu, bidet in custu òrdine una creatzione de Deus e si isfortzat de pònnere paris su mecanitzismu cun su finalismu, s’iscièntzia de sa natura cun sos printzìpios de sa metafìsica.
Caru Peppe ma Dante no’ ti piaghet?
«Chiamavi ‘l cielo e ‘ntorno vi si gira,
mostrandovi le sue bellezze etterne,
e l’occhio vostro pur a terra mira;
onde vi batte chi tutto discerne».
INTELLETU E ISTRUTZIONE
I
Narat Platone chi Sabidurìa
comintzat semper cun sa meraviza,
ma oe a custa zente ‘e su duamiza
peruna cosa lis faghet ispantu.
In sa virzine ancora pitzinnia,
cando s’Intelligentzia tenia abiza,
curiosu forrogai a piza a piza
su mundu, chi pariat tottu un’incantu;
e si no bistat chi mi nd’ana frantu
da s’isprigu ‘e sos ogios s’istupore,
fu’ abarradu fidele a cuss’Amore
chi ogni coro zentile faghet s’antu.
E invece a dolu meu m’an istruídu
e mai apo a torrare gai istupídu.
II
Nachi fu po che ogare s’ignorantzia
chi an resu obbrigatoria s’istrutzione,
e invece ch’an bogau sa Traditzione
lassandemos, po finta, calchi impiastru.
Innanti che tenimis abbundantzia
de Obreris e de Ischentes a muntone;
buttegas s’agattait a ogni chizone
e ognunu in s’arte sua fuit unu Mastru.
Maestria fuit a intretzare canna e ozastru,
b’iat arte manizande marra e pinna,
e Mastros ch’iat po pannu, ferru e linna;
ma como cun s’iscola…. ite disastru!
Sa mente chi fuit sabia, lestra e bona
s’est fatta primmu macca e poi mandrona.
III
No’ bastat chi cunvintu ch’at sa zente
a diventare massa uniformada,
cust’ispecie ‘e cultura il-latinada
s’Ischire ch’at boltadu in par-Istoria
Cussu chi naran como intelligente
de vera Intelligentzia pagu nd’ada,
s’istrutzione bi l’at indrommigada
e lassadu l’at solu sa memoria.
E gai si faghet titulu de gloria
de tottu sas modernas colcorigas,
ca po biver sa vida ‘e sas frommigas
s’Intelligentzia no est obbrigatoria:
bastat s’istintu chi dat sa Natura
e una vernice de media cultura.
IV
Però mancari creben sos butzinos
chi sun oldivinzande cust’ingannu,
no tottu in d’unu male est unu dannu
ca semper una faccia b’at contraria.
Chie tenet Fide in sos Pianos Divinos
po custu mundu no si leat afannu,
ischit chi b’at un’Ordine prus mannu
de sa nostra esistentzia chi est precaria.
Ma sos chi creen a sa vida ordinaria
no bien’ su Sacru e no tenen’ rispetu
ca “peldidu an’ su bene ‘e s’Intelletu”
chi fuit s’unica cosa netzessaria.
E oe senza Intelletu, cun Resone,
chie l’at s’immaculada Cuncetzione?
V
Cuddas “madonnas” ch’in tempus issoro
cantain sos trubadores medievales
fuin tottu Cunfrarias intellettuales
e i sa Sabiduria fuit s’Amorosa.
Ispantu e zentilesa aian in coro
ca si nutrian de pane ispirituale,
ammaniadu cun Arte Magistrale
da sos Obreris de sa santa Isposa.
«Amor e cor gentil sono una cosa»
fuit Unu in cantu ‘e s’Obreri Mazore,
chi cun Arte, incantande ogni Priore,
li faghiat cun-templare cussa Rosa.
Ma como chie l’incantat su profanu ?
An gana de li dare tonforanu…!
da “Sa Rosa de Sorìa”
……………..
………………..
Si ti mando sa pranta in custu “vasu”
chi at bidu mezus terra e mezus Fiore
est po dare a su sardu prus onore
e un’auguriu a cussu comitadu.
Chi retzat su podere dae Parnasu
de operare cun Arte e cun Sabiore,
che-i cuddos chi fideles fuin’ de Amore
cando a limba dialetu nd’an pesadu.
Ca sas obras chi Deus at cunsagradu
mezoran e dan fruttos genuinos,
invece sos tribaglios de ciapinos
no solu no produin ma dan’ infadu.
Benennidu siat duncas su progettu
si Amore at ispiradu s’architettu.