A sa fine s’assessoradu de s’istrutzione pùblica at dèpidu fàghere torrare sos contos. Sigomente at postu 750 mìgia èuros pro s’insignamentu de su sardu in iscola: dae in ue los at laeados? Ma dae sos ufìtzios de sa limba sarda est òviu. Sigomente in custos ùrtimos annos no at pagadu sas integratziones a sos ufìtzios chi impreant su sardu in s’amministratzione pùblica, nd’at leadu custu dinare l’at postu in sas iscolas.
Duncas, perunu istantziamentu nou, petzi giogos de bilantzu pro fàghere crèere chi a sa limba sarda est arribende dinare meda cando est prus pagu de s’annu coladu. In su 2015 difatis s’istantziamentu fiat de 900 mìgia èuros, ma s’est impegnadu petzi prus pagu de 700. Ma custos 900 puru fiant una posta de giru: difatis sos 450 mìgia de su 2014 los aiant truncados e tando los ant torrados a pònnere in su 2015. Giogos de capìtulos e summas chi faghent bènnere su dolore de conca, ma chi sunt sa manera pro cugutzare cun unu comunicadu imprenta chi totu est semper frimmu e chi si girat in tundu.
Sa beridade est chi su bilantzu aprovadu non s’ischit si s’at a rispetare in totu e chi petzi a sa fine de s’annu s’at a cumprèndere cantu dinare efetivamente sunt ponende. Leghende bene su bandu de s’iscola custu si cumprendet bene. Atenzionadae sas notas in grasseto in fundu.
E sas normas de atuatzione chi galu non si bident? Bilantzu frimmu e bandos non publicados. Peruna initziativa pro dare prestìgiu e giudu a su sardu. Declaratziones pùblicas semper sas matessi in fotocòpia e sena nàrrere nudda de balia.
Sa polìtica linguìstica in custos ùrtimos ses meses est abbarrada siddida che roca, sena mai si trèmere. Est beru chi sòtzios e operadores medas sunt istados impitzados in sos progetos de sas iscolas, ma a banda cussu non si cumprendent posca cale est sa lìnia de sa Regione pro custos meses imbenientes dae inoghe a sa fine de s’annu.
Est duos annos chi si faeddat de sas normas de atuatzione de s’istatutu, ereditadas dae su guvernu Cappellacci chi non fiat resessidu a las aproare, ma galu non si nde cumprendet su destinu e sa realidade de aplicatzione. Pro ocannu, comente aiamus giai iscritu, non s’ant a aplicare e calicunu timet finas pro s’annu chi benit. Difatis, sa simple aprovatzione de sas normas dae banda de su guvernu no est bastante. Bi diat chèrrere un’atu de retzepimentu, o nessi un’intesa cun su Dipartimentu de sos Afares Regionales, pro fàghere transitare totu sos protzedimentos. Sunt cosas dìligas a livellu brurocràticu e si unu non si ponet de cabu bi podent colare meses e annos finas. In su mentres si sighit a las annuntziare a ogni addòbiu pùblicu comente chi esserent sa meighina de totu sos males, ma no est gasi. Sa beridade est chi pro como non bi sunt.
A su chi resultat imbetzes su Ministèriu est semper prus tirannu in sa gestione de sa polìtica linguìstica, e at postu totu unu muntone de règulas noas in sa gestione de sos isportellos chi sunt ponende in dificultade sas aziendas chi sighint custos traballos. B’at tensione e arrennegu meda ca paritzas persones podent pèrdere su traballu. Una chistione chi est pesende-si e chi at a èssere atentzionada pro isvilupos particulares chi podet tènnere in custas chidas.
Ma totus sas miradas sunt punnadas a sos ufìtzios iscolàsticos in ue sa Regione at postu a cùrrere su dinare chi in antis fiat pro sa limba in sa pùblica amministratzione. De custos at a tocare a bìdere cales sunt andados a dae in antis e comente. Però treballeddos pro sos operadores nd’at essidu a pìgiu. Ma no est beru chi est un’istantziamentu nou. Est comente pro sa chistione de sos 80 èuros de Renzi: ponent in unu logu e tirant dae s’àteru.
Ma in prus b’at un’acontzu de lìnia polìtica. Sigomente chie disinnat in s’assessoradu e in ruga Roma de linguìstica non bolet su sardu ufitziale unitàriu, a leare traballu dae sos ufìtzios (chi naschent pro custa cajone pro difùndere sa limba ufitziale), issorvet sa chistione. Sa limba sarda, dae ingendru de limba normale e natzionale standard, torrat a progeteddos in ue est matèria folk de ispàssiu de sos pipios. Comente a sos tempos de sa lege 26 chi praghet meda a universidade e folkloristas. Duncas un’investimentu faddidu chi si perdet in milli arritzolos.
Giustamente in sos progetos su sardu veicolare est obligàtoriu comente giai desinnadu in su 2011 e 2013: ma tantu chie podet controllare? Nemos. Sos ufìtzios regionales, pro cantu capatzos, non bi la faghent.
(redatz)
Leave a comment