-de Alexis Barranger-
Ocannu puru, b’at a èssere su Gay Pride (sa fieresa gay) de Sardigna, in Casteddu, su 25 de Làmpadas. S’eventu, isetadu meda, est organizadu dae unu muntone de assòtzios de s’ìsula che a Arc onlus, Agedo, Sardegna Queer, Unica LGBT e galu àteros. Su pride matessi, chi est pròpiu sa manifestatzione in is arrùgas de sa capitale de Sardigna, est sa concluida de su chi est mutìdu “Queeresima”; unu ensemble de eventos in totu su territòriu cunstituidu dae cuntzertos, dibatas, atòbios, durante unu periodu de 40 dies, dae sa die internatzionale contra a s’omotransfobia su 17 de maju, finas a su GayPride su 25 de Làmpadas.
Una manifestatzione importante meda pro sa vida tzivile de s’ìsula, in ue si espressant is ideales de egualidade e dinnidade de sa comunidade LGBT (chi contat puru unu muntone de persones “etero”, est a nàrrere simpatizantes, babbos e mamas, polìticos, atores sotziales, assòtzios de totue, mancari non partetzipent a s’organizatzione de s’eventu). Est unu momentu de autocrìtica e de “bìvere-imparis” (pro ammentare unu frantzesismu ; “le vivre ensemble”) a intro de sa vida pùblica, e tzivile. Est una comunione pro persones medas chi ant bisòngiu de bighinàntzia e suportu morale, bisòngiu de si intèndere acumpangiados e sustenidos. Est puru unu eventu particolarmente càrrigu de emotziones, pustis su chi est acontèssidu in Orlando su dòighi de Làmpadas. Solennidade, dinnidade, fieresa, meledos, allegria, deretos e rispetu.
A intro de su programa de sa Queeresima b’at àpidu prus o mancu tres atòbios a pitzu de s’Intersetzionalidade de sas cumbatas; su 28 maju “Intersetzionalidade de sas cumbatas lèsbicas e feminìstas in sos ispàtzios ocupados”, s’8 de làmpadas “Feminismu e cumbatas intersetzionales”, e dae su 20 a su 26 de làmpadas sa Mustra “Intersetzionalidade @ Casteddu”. Oe nos amus a analizare custa notzione impitada in su campu de sa sotziologia pro mégius cumprendere is disafios cuntemporàneos chi pertocant sa temàtica de sos deretos tziviles e umanos; duncas is cumbatas de sa sotziedade nostra.
S’intersetzionalidade (in Inglesu; Intersectionality) est unu neologismu usadu dae sa giurista, costitutzionalista & abogada americana Kimberlé Williams Crenshaw, chi fiat professora in sa UCLA School of Law e in sa School of Law de Columbia. Sa teoria cosa sua cunsistet mescamente a ispiegare chi is varias dominatziones a contra de is persones a intro de una sotziedade no podent essere acraridas e analizadas separatamente, chi sas làcanas intre is varias opressiones e discriminatziones sunt illusorias ca cada stigma est ligadu a sos àteros dae una “matrix dominationis” (Matrix of domination). Duncas est unu istùdiu sotziològicu e polìticu de sas opressiones e discriminatziones, chi siat omofobia, sessismu, ratzismu, transfobia, xenofobia e g.s, e de is ligàmenes intre issoro; est a nàrrere chi cada “setzione” depet essere analizada imparis cun sas àteras; inter-setzionalidade.
Unu casu contretu est custu, illustradu dae unu artìculu giurìdicu de Kimberley Williams Crenshaw in su 1989, in ue pròat a cumprèndere pro ite is fèminas nieddas agatant dificultades pro fàghere reconnòschere dae sa giustìtzia is discriminatziones chi sùbint in su logu in ue traballant, “In su deretu americanu, is vìtimas de discriminatzione dèpent isseberare su fondamentu de sa discriminatzione chi at a cunstituire sa base pro sighire s’atzione in su tribunale, su sessu o sa ratza pro esempru. Però custu vìnculu andat a contra de is fèminas Nieddas, a bisu de sa Prof. Crenshow. Si issas basant s’atzione in giustìtzia cun su fondamentu de su sessu, s’atzione at a essere refudada dae is tribunales chi sutaliniant chi àteras fèminas (arbas/europeas) no agatant is dificultades chi sas fèminas nieddas lamentant. Si però isseberant de si presentare comente vìtimas de discriminatziones ratzistas, is tribunales refudant is atziones giurìdicas argumentende chi àteros Nieddos (òmines) no agatant is dificultades chi lamentant. Is fèminas Nieddas no sunt discriminadas comente [isceti] Fèmina/Niedda, ma sunt discriminadas pròpiu comente Fèminas Nieddas. S’intersetzionalidade serbit a custu: rivelare realidades chi a s’ispissu sunt “invisibilizadas”.
Su cuntzetu però podet essere cumpresu e intèndidu in un’àtera manera; su chi in Frantza est mutìdu “Convergence des luttes” ; Cunvergèntzia de is Cumbatas; duncas in s’àmbitu polìticu e militante s’interconnessione e is ligàmenes intre sas dibatas tziviles e is pretesas de sos tzitadinos o comunidades a livellu giurìdicu o sotziale. In s’istòria moderna amus bìdu movimentos medas chi si sunt istruturados in una manera cumpòsita; est a nàrrere pro esempru chi s’istòria de su feminismu non podet èssere analizada, comente dibata/cumbata sotziale separatamente dae is movimentos pro is deretos LGBT, o sos pro is deretos de is Afroamericanos, o sos pro sa dinnidade de is musulmanos e immigrados de oe, o s’antiratzismu.
Sigomente s’opressione aplicada contra a is tzitadinos chi faghent parte de minorìas sotziales est plurale e non pertocat isceti una classe/comunidade (setzione) sotziale ma a s’ispissu una pluralidade de setziones, puru sa cumbata pro sa dinnidade e is deretos de sos matessi sogetos oprimidos depet essere plurale. Est su chi de oe rapresentat de prus s’idea de s’intersetzionalidade. S’unione nos faghet prus fortes. Tando istoricamente b’at unu ligàmene forte intre liberatzione de sa fèmina e reconnoschimentu de is deretos LGBT, liberatzione de sos Afroamericanos e Antimilitarismu/Patzifismu, antiratzismu e pretesas de is tzetos prus dèbiles de sa sotziedade (Touche pas à mon pote in Frantza, chi est in su matessi tempus unu movimentu antiratzista, ma est puru unu movimentu pro su welfare a intro de is ghettos in cue bìvent is populatziones prus pòberas e sas de s’immigratzione).
Dae sa parte de s’opressore b’at puru una genia de intersetzionalidade, siat chi esseremus faeddende de sa dereta estrema o su jihadismu, o su Catolitzismu fundamentalista, podimus bìdere chi no b’at mai isceti una setzione atacada, ma prus setziones imparis. Sa fèmina, is omosessuales, is immigrados (semper chi siant Nieddos, o Arabos, ca unu immigradu frantzesu o norvegesu no dat perunu fastidiu), is Musulmanos (e nono “islàmicos” comente si narat in limba Italiana), is Ateos, is giornalistas, e gasi sighende.
S’ISIS, chi est unu istadu/califadu islàmicu (pro no nàrrere unu imperu de is macos e psicopàticos) impreat custa lògica; est a nàrrere s’intersetzionalidade de s’opressione; chi siant fèminas de una àtera religione (Yazedis & Cristianos), refudende sa dinnidade a sa Fèmina, chi est a s’ispissu fata iscrava e patit tortùras e violèntzias sessuales. Sos omosessuales chi sunt ghetados dae sos palatzos de is tzitades o abrusiados bìos, is àteros musulmanos chi forsis sunt a contra de s’ISIS e gherrant contra a issos cada die. Sa dereta estrema in Europa, ipercatòlica, autoritaria, che cherret torrare a coa in materia de deretos de s’òmine, de libertade de istampa, de opinione. Chi est a contra de sa dinnidade de is omines e fèminas lgbt, usende a s’ispissu una retòrica chi a beru est sessista e retrògrada, bìdende sa fèmina comente sa chi depet istare in coghina, a si ocupare de sa famìllia, comente una cristiana bona e ubediente. Chi a s’ispissu puru est a contra de sa diversidade sotziale e culturale, duncas refudat cada dinnidade a chie no tènet sa pedde crara, e professat s’unipartitismu, ingiùliat is giornalistas ca faghent parte de su “sistema” contra a su cale issos diant gherrare.
B’at, in Europa, unu muntone de atziones chi sunt ispiradas a cust’idea de s’intersetzionalidade de sas cumbatas; pustis de sos atacos terrorìsticos de Charlie Hebdo e de su Bataclan, in Parìs b’est istadu unu movimentu ispuntàneu e massivu, pro prima cosa in sa Pratza de sa Repùblica, pro ammentare is mortos e prànghere imparis, faeddare, discùtere, allegare, a cara-cara, e pustis dibennende unu beru e pròpriu movimentu de protestatzione chi si naraiat “Les Nuits Debouts”, chi fiat mescamente una dibata manna e un‘ocasione pro criticare e chistionare a pitzu de sa sotziedade Frantzesa cuntemporànea e agatare puntos a cumone pro cambiare is cosas, a foras de is partidos, comente aiant fatu sos movimentos de sos indinnados in Ispagna e in àteras natziones pustis de sa crisi finantziara de su 2008.
B’at puru unu movimentu sena nùmene, de gente, istudiosos, intelletuales, iscritores, polìticos e tzitadinos chi gherrant e cumbatant pro una sotziedade mégius, protegende is LGBT dae sa violèntzia fitiana, lotende contra a su ratzismu, sustenende is movimentos musulmanos republicanos, democràticos & moderados in Fràntzia (contra a s’islamofobia generalizada), gherrende puru contra a s’antisemitismu chi torrat in Europa, e gasi sighende. Unu movimentu chi cunsiderat su diàlogu intre comunidades comente sa solutzione; est a nàrrere chi no b’at peruna làcana intre Musulmanos e gays, Lèsbicas e Nieddos de Frantza o Italia, Fèminas e Pòberos, Ebreos e Trans; b’at una matrix dominationes, e pruschetotu una matrix persecutiones chi podet essere destruida cun su diàlogu, sa passièntzia, sa cooperatzione, su cunfrontu, sa coesione sotziale, a intro de sa vida tzivile, chi siat peri sas carreras de is tzitades nostras che a sa GayPride, o puru a intro de sas aulas parlamentares.
Ca a s’ispissu sa matrix dominationes, comente naraia subra, est s’innorantzia, sa cooptatzione, s’inatzione e sa desperatzione. E b’at unu rimediu: ses Tue.
Leave a comment