-de Crara Farina-
Sa Cavalcada Sarda est sa festa prus nòdida de Tàtari e una de sas prus importantes de sa Sardigna. Si sos tataresos in ciabi preferint Li Candaleri, festa de fide e traditzione tzitadina, sos sardos de sas biddas de cada logu de s’Isula benint a Tàtari pro sa Cavalcada chi est sì prus reghente, ma sena duda prus agradessida, pro s’ispiritu làicu chi la distinghet dae su Redentore o dae Sant’Efisiu.
Sa prima Cavalcada est istada ammaniada in su 1899, in onore a su re Umberto I e a sa mugere Margarida de Savoia, bènnidos a festare su monumentu a Bitòriu Emanuele postu in Pratza de Itàlia.
Eo so biddaresa bènnida a istare in Tatari in su 1977, e dae tando apo vìvidu custa festa comente festa mia e de totu sas biddas de Sardigna, pagu m’importat si sa die sos tataresos in ciabi si nch’andant a Platamona e non festant cun nois.
Apo semper pessadu chi custu abboju esserat una bona ocajone pro mustrare sas bestes e sas prendas, sa musica e sas dansas nostras, ma finas sa cosa prus bella e importante chi tenimus, sa limba.
Pro paritzos annos apo pedidu a polìticos de destra o de manca de poder presentare s’isfilada in sardu, sa limba nostra natzionale, ma de badas. Mi pariat chi no ebbia s’inglesu, o su frantzesu e su tedescu, paris cun s’italianu esserant limbas dignas de faeddare de sas cosas nostras, e chi sos turistas ischerant chi paris cun sas bestes e sa musica e sas dansas, amus una limba chi nos distinghet dae totu sos àteros pòpulos.
Chi sa limba est su modellu chi dat forma e sustàntzia a su restu de sa cultura siat materiale che ispirituale. Mi pariat chi a faeddare de sas cosas nostras in limba nostra aperet un’ateru valore e significu. Diferente est a li nàrrere ragas in giambu de calzoni, coritu in giambu de bolero, bentone pro camicia, furesi e no orbace.
Pustis de tantos annos, in su 2014, una Dirigente napulitana, colta e inteligente, de sa comuna de Tàtari m’at dadu sa manera de pòdere isfundare una ghenna chi fiat tancada dae paritzos annos, e como sunt tres annos chi s’abbertura de sa Cavalcada si faghet in sardu, m’ est pàrfidu chi siant in medas sos chi aprètziant, e sos sardos no semus prus ispetadores ma atores, no prus ogetos de mustra ma sugetos printzipales.
Leave a comment