Universidade Sarda e oligarchia

– de Andria Pili –

Eris, bator rapresentantes de sa classe dirigente polìtica e acadèmica sarda (su presidente de sa RAS Francesco Pigliaru, s’assessora de s’istrutzione pùblica Claudia Firino e is retores de is Universidades de Casteddu e Tàtari Maria Del Zompo e Massimo Carpinelli) si sunt addobiados cun su ministru de s’istrutzione Stefania Giannini pro faeddare de is dannos chi is critèrios de aplicatzione noa de valutatzione de universidade e chirca – che su costu istandard istudiante- ant fatu in Sardigna.

Ant fatu presente chi sa Sardigna est un’ìsula e chi tenet una densidade bassa de populatzione. Sa Giannini – ite istraviadura chi depet àere tentu! Scedada – duncas, a sa fine s’est sapida de custa cunditzione e at donadu promissas de modìficas perecuativas giai pro ocannu e de pònnere in contu sa “discriminante de s’insularidade” pro is annos chi ant bènnere.

Maria Del Zompo at fatu ischire de èssere satisfada de s’impignu pigadu dae su ministru de su guvernu Renzi. Deo naro: ma satisfada de ite!? Sa Magnìfica, puru si at tentu su mèritu de àere faeddadu ladinu meda a pitzu de s’arriscu de serrada de is universidades sardas, at giai tentu unu cumportamentu discutìbile in s’assemblea aberta de su Senadu Acadèmicu – de su freàrgiu coladu – torrende gràtzias a is parlamentares de su PD e a is assessores regionales pro more chi sunt interessados de is problemas de is ateneos sardos. Comente si no èsseret su dovere issoro a si interessare e comente si, cun su cumportamentu issoro, no àerent giai fatu dannos!

Creo chi no b’at pròpiu nudda pro èssere satisfados. S’oligarchia sarda, torra, est andada a Roma a limosinare carchi cosa e a pustis est torrada pro nos nàrrere chi depimus donare fide a su guvernu italianu. A nemos de issos est bènnidu a conca chi is universidades sardas sunt is universidades nostras. Non b’at a èssere mai resone de èssere satisfados finas a cando no at a èssere sa Sardigna a valutare s’universidade e sa chirca suas, pro is chi sunt is obietivos suos de isvilupu e is orientamentos educativos chi amus a iscriere nois pro is interessos nostros.

Cussos bator ite diant dèpere rapresentare a is istudiantes sardos?

Sa giunta regionale no at fatu nudda pro defensare is cumpetèntzias regionales a pitzu de s’istrutzione e sa chirca, no at fatu nudda contra a sa riforma de s’iscola e contra a s’aplicatzione de is riformas universitàrias, at fatu provedimentos contra a su deretu a s’istùdiu (comente su de artziare is CFU pro donare is agiudos pro is allogos, a pustis revocadu isceti pro more de is protestas de is istudiantes). Is retores sighint a pompiare custa classe polìtica in totu.

Ma no amus a otènnere mai nudda dae una protesta chi abarrat totu a su livellu istitutzionale, totu a intro de sa classe dirigente sardo-italiana inimiga de is interessos de sa majoria de su pòpulu nostru e chi cumpartzit su matessi progetu polìticu econòmicu chi est sa base de custa polìtica universitària chi cheret chi is ateneos nostros siant periferias de s’istrutzione europea e italiana. Perunu isperu e peruna fide si podet donare a is polìticos e acadèmicos majores. Is istudiantes depent èssere a sa conca de custa batalla, ponende sa chistione sarda comente tzentrale pro cumprèndere sa situatzione e dda risòlvere.

Est pretzisu a tènnere una manera diferente de pensare e fàghere. Sa cummèdia issoro est semper sa matessi, cuende is problemas fundamentales: sa dipendèntzia e su progetu neoliberale de educatzione superiore. No istamus in antis a una medida isballiada, nàschida proite is guvernos no ant donadu cura a is “fatores territoriales” nostros…istamus in antis a unu progetu definidu, pessighidu dae duos deghènnios e chi si unit a is relatas de domìniu e subalternidade intro de s’Istadu italianu.

S’unica alternativa podet èssere isceti radicale e podet nàschere dae s’organizatzione natzionale e anticolonialista de is istudiantes sardos pro rùere cun sa dipendèntzia e su neoliberalismu: su podere legislativu sardu a pitzu de s’istrutzione, pro fraigare una Universidade Sarda pro s’isvilupu de sa Sardigna.