Pro su 2016 nudda normas de atuatzione de s’istatutu ispetziale pro sa limba sarda. In prus però b’at una truncadura de sos fundos de sa lege 482 pro sos ufìtzios linguìsticos.
Non sunt bonas sas novas chi lompent dae su Dipartimentu de sos afares regionales de Roma. Cun sa publicatzione de su decretu de ripartitzione de sos fundos de sas minorias linguìsticas de ocannu, si sunt bènnidas a ischire unas cantas cosas.
Sa prima est chi su decretu partzit sas summas finas pro sa Sardigna e duncas sas normas de atuatzione meda bantadas non s’àplicant. Pro ite? Averguadura lestra cun sos beneinformados romanos. Sas normas ocannu non s’àplicant ca est beru chi su guvernu at aprovadu s’ischema e su Presidente de sa Repùblica at fatu sa parte sua sende chi est totu publicadu in sa Gazeta Ufitziale, ma mancat un’atu normativu de sa Regione de retzimentu. Ma sa Regione no at presse, e duncas su decretu de ripartitzione s’est fatu a s’antiga. De normas de atuatzione si nd’at a faeddare in su 2017, si sa Regione in su mentres faghet su suo.
In su mentres, s’istantziamentu totale pro totu sas minorias italianas est de 1.710.256 cun belle 400 mìgia èuros in mancu in cunforma a su 2015. Pro sa Sardigna petzi 400 mìgia èuros, 70 mìgia in mancu de s’annu antepostu.
Si sas normas de atuatzione esserent intradas in vigèntzia, s’ùnicu poderiu in prus chi àeret leadu sa Regione diat èssere istadu cussu de detzìdere in pitzu de custu tantu. Sos progetos de sos ufìtzios imbetzes de los valutare in Roma, si diant medire in Casteddu.
Una cosa chi podet èssere finas unu boomerang segundu sa punna. In duos annos difatis sa Regione at istantziadu e posca torradu a leare 1 milione de èuros dedicados a integrare su finantziamentu istatale. Mai s’est chesciada pro finantziare de prus sa 482. Sos ufìtzios e sos operadores difatis sunt minimende minimende.
Cale est tando sa punna de sa Regione? A valorizare su sardu in s’amministratzione pùblica o a acabare unu mundu chi non servit a s’idea de dialetu e folklore chi medas de sos chi guvernant tenent tenent de su sardu? O a pònnere totu custu mudu in intro de s’iscola pro lu bardare mègius?
Sa cosa curiosa est chi unos cantos operadores, sende chi sunt Regione e Istadu a segare, o a non gastare, in tamen de si la pigare cun issos, si la pigant cun custu giornale o cun su CSU ca iscòbiant sas cosas.
Lògicu, no?
(dir)
Leave a comment