Csu cun Don Chisciotte in sardu andat a sa gherra contra a sos molinos a bentu de sa Regione. Fundos limba sarda 2015 non gastados pro su 40%.
Su Coordinamentu pro su sardu ufitziale est meravigiadu de sa die dedicada a sa limba sarda oe dae sa Regione, ammaniada in Casteddu belle a sa muda e belle sena abèrtere sa populatzione, in sa matessi die de sa presentada de su Don Chisciote “nostru” in sardu, fissada pro custu sero in Tàtari dae duos meses.
A pustis de duos annos de immobilismu e pràticas dannàrgias, s’assessoradu regionale de s’istrutzione pùblica in fines at cumpresu chi su tema linguìsticu est importante, e si presentat a s’opinione pùblica pro revindicare in fines su rolu suo de ghia de sas polìticas linguìsticas. Sos obietivos sunt craros: leare galu tempus in mancàntzia de una visione istratègica, assegurare unu caminadòrgiu eletorale a unos cantos polìticos, influentziare su Cussìgiu Regionale in bistas de una sessione difìtzile de sa Finantziària. Làstima chi cussa polìtica linguìstica chi podiat èssere unu gigante s’est mustrada in custos 24 meses unu molinu a bentu chi produit, a sas beras, petzi àera frissa.
Sena contare su minimòngiu sena remèdiu de unos 4 milliones de èuros fatu dae su chi tando fiat su guvernu regionale nou in s’assentamentu 2014, s’assessoradu de s’istrutzione pùblica no est resessidu a gastare de su totu in un’annu mancu sos pagos fundos postos a disponimentu dae sa finantziària 2015. De belle 1.800.000 èuros postos in su bilàntziu pro sa limba sarda (una pertzentuale suta de su 0 vìrgula a cunfrontu de sos belle 7 milliardos de sa manovra de antiannu), resurtant no impinnados e duncas pèrdidos e andados in economia belle 700 mìgia de èuros, pari a su 40 pro chentu de totu s’istantziamentu.
In mesu de sos setores prus tocados dae custa inefetividade, sos ufìtzios linguìsticos, s’insinnamentu in iscola e sas tzelebratziones de Sa Die de sa Sardigna. Unu setore intreu chi in sos ùrtimos deghe annos fiat crèschidu est istadu mortificadu, demotivadu e postu a pee in terra. Sunt medas sos giòvanos chi aiant investidu in custos istùdios chi sunt disocupados o ant isseberadu su caminu de su disterru.
Su CSU at gastadu duos annos de comunicados e lìteras pro pònnere in s’avisu e sinnalare a sa Regione su perìgulu de custas inefetividades, ma, pro bambiore e presumimentu polìticu, no l’ant ascurtadu.
Sa lista de sos dannos procurados in petzi 24 meses est longa. Sa lege istòrica n 26 de su 1997 in pràtica l’ant abolida, sena abèrtere su Cussìgiu Regionale, ca no l’ant finantziada. Su Pranu Triennale, s’Osservatòriu e sa Cunferèntzia Ufitziale annuale, mèdios de cuntzertatzione e co-partetzipatzione a sos issèberos polìticos, cantzellados. Su Servìtziu Limba Sarda l’ant neutralizadu, accorpadu e privadu de su bonu de sos funtzionàrios. S’Ufìtziu Limba Sarda no at fatu prus atos istitutzionales in sardu, sa funtzione sua pro lege. Su Curretore Ortogràficu, su ditzionàriu e sas gramàticas lassados a su chi si cherent fàghere. Sos progetos valorosos Bilinguismu Creschet e Alimus, cumintzados cun sas universidades prestigiosas de Edimburgu e Grenoble, non rennovados. Sa Limba Sarda Comuna arressa, sos cursos de alfabetizatzione banalizados. Sas rivistas in pabiru e in lìnia in sardu non finantziadas, sas òperas didàticas subra de sa limba non pervènnidas. Sas tradutziones in sardu de sos clàssicos postas a un’ala. Sos ufìtzios linguìsticos comunales e provintziales ant bidu in duos annos su minimòngiu di 1 millione de èuros e si devent cuntentare de sa misèria de 400 mìgia èuros ministeriales. Sas normas de atuatzione de s’istatutu, bantadas in una manera de non pòdere crèere, ant a dare a sas beras ‘soverania’ petzi pro custa tzifra de pagu contu. Pro custa e àteras resones su Coordinamentu pro su Sardu Ufitziale no aprètziat sos apuntamentos polìticos oportunìsticos subra de sa limba chi servint petzi a pesare unu discussionismu inùtile e provocatòriu cun operadores malàidos de sìndrome de Istocolma. Torrat a pònnere in craru, imbetzes, s’importàntzia de leare parte oe in Tàtari a sa presentada de su Don Chisciote, monumentu de sa literadura universale traduidu in sardu. Unu fatu cuncretu, una realizatzione istraordinària chi bastat a sa sola a parare fronte a un’immobilismu duradu duos annos. In sa manifestatzione de oe, in Tàtari, in sa libreria “Messagerie Sarde” in pratza de Casteddu h. 18, ant a aprovare unu documentu de protesta e de propostas chi l’ant a imbiare a sas autoridades regionales in s’isperu chi in sos 3 annos chi abbarrant de legisladura b’apat collaboratzione, cumpartzimentu e sa renàschida de sa limba sarda.
CSU – Assemblea direttiva
Casteddu- Tàtari 26 de freàrgiu de su 2016
Leave a comment