Sa Regione at torradu a truncare sos fundos a s’Ufìtziu Regionale de sa Limba Sarda o a su chi nd’abarrat. Dae sos 250 mìgia èuros istantziados in su 2014 pro su 2015 (duncas dae sa Giunta Cappellacci) si colat como a sos 150 pro su 2016. Sunt lompende truncaduras a su servìtziu chi bidet galu traballende 5 oberadores intre Casteddu, Tàtari e S’Alighera. Custa faina sighit a sa sostitutzione de su diretore istòricu Giuseppe Coròngiu, a sa tancadura de su Servìtziu Limba Sarda cun su declassamentu de livellu e s’acorpamentu a su servìtziu Editoria. In custos annos finas duas funtzionàrias diretivas ant pedidu sa mobilidade e si nde sunt andadas a àteros servìtzios. S’ufìtziu (chi ormai est unu meru e sìncheru ufìtziu de tradutziones) at a essere semper gestidu dae Sa Bèrtula Antiga chi at bintu sa gara de apaltu contra a s’Istitutu Bellieni. Su Fronte Indipendentista Unidu pensat chi sas ùrtimas truncaduras ant a rùere mescamente in sa sede de Tàtari. In su mentres chi bidimus ite càpitat amus detzisu de publicare su comunicadu. Cada resposta (in sardu) est benebènnida.
Comunicadu
Su Fronte Indipendentista Unidu denùntziat s’indebilitada de su servìtziu de s’isportellu linguìsticu regionale de Tàtari: ant reduidu sas resursas dae s’Assessoradu a sa Cultura.
Custa noa cumparet in s’alliongiadu tècnicu de s’Assessoradu de sa Programmatzione, Bilantzu e Assentu de su Territòriu.
In s’alliongiadu tècnicu a su bilantzu pluriennale pro sos annos 2014-2016, in sa boghe “Strategia – Patrimonio Culturale – Dare forza a una identità viva – Interventi a favore della Cultura”, sa previsione de sos fundos pro sos isportellos linguìsticos regionales fiat de 250.000 € pro cada annu de su triènniu interessadu.
Ma cunforma a su bilantzu pluriennale pro sos annos 2015-2017, sa previsione pro sos isportellos linguìsticos est minimada a 150.000€ pro sos annos 2016 e 2017.
Custu trincu de sos fundos cajonat netzessariamente unu trincu in su personale chi bi traballat. Difatis in su 2015, chimbe operadores linguìsticos ant pòdidu traballare cun sa summa totale de 250.000 €: duos in Casteddu, duos in Tàtari e unu in s’Alighera.
In su 2016, bidu su trincu de sos fundos, s’isportellu de Tàtari at a èssere indebilitadu.
Galu tocat de detzìdere si unu de sos operadores at a pèrdere su traballu, o si ant a traballare ambos duos ma pro prus pagas oras a sa chida.
Probabilmente b’est sa voluntade polìtica e amministrativa de eliminare o indebilitare s’ufìtziu de Tàtari e no ischimus su proite.
Cun cust’operatzione “casteddutzèntrica”, sa cultura e su prestìgiu de sa limba ant a pèrdere meda in su territòriu de Tàtari, totus chi dae s’assessoradu ant a segare sas oras in totu sos isportellos regionale.
Su presìdiu de Tàtari fiat garantidu in custos annos colados, e dae su 2016 o at a iscumpàrrere o at a tènnere semper prus pagu poderiu de atzione. Est una làstima, ca in su territòriu de Tàtari s’ufìtziu est unu puntu de riferimentu pro bator minorias linguìsticas e arriscat de pèrdere duas figuras professionales mannamente cualificadas.
Nois de su Fronte pensamus non solu chi s’ufìtziu de Tàtari depat abarrare cun ambos duos sos operadores in atividade (e possibilmente afortigadu), ma fintzas chi chimbe operadores pro totu sa Sardigna intrea siant pagos meda.
Isetamus como de ischire cale est su benidore de s’isportellu linguìsticu de Tàtari, e amus a fàghere su chi est in poderiu nostru pro non lu lassare serrare nen tot’a un’ora e nen pagu a pagu.
Su Fronte Indipendentista Unidu
https://www.regione.sardegna.it/documenti/1_274_20150107181004.pdf)
Leave a comment
No est una noa, ma isthoria antica che sos politicos sardo sunt semper isthados tzeracos de sos dominadores anzenos. No est una noa, ma istoria ‘etza cussa ki ant semper kilcadu de atzentrare a Cagliari totu sos poderes e a nd’ogare totu a Thathari e fintzas como, ki semus una “rejione autonoma”, semus sighende gai. Ma sigumente, sos politicos sardos e sos pseudo intelletuales sardos, semper theracos de sos anzenos, sunt redessidos a narcotizare sa cuscescia e s’identidade de su Pobulu Sardu, sos thatharesos, oramai fintzas imburdhidos de atera zente, no s’ant a rebbellare prus, comente intamen faghiant in ateros tempos pro si fagher respettare. Unu Pobulu kena raighinas, at finidu de esser unu Pobulu e no meritat respectu