Duos annos de bòidu e petzi como sos primos interventos in sas iscolas. Sa Regione non resessit a èssere atziva in sas polìticas linguìsticas iscolàsticas mancu cando ponet unu muntone de dinare. Su 2014 e su 2015 sunt colados sena mancu un’ora de sardu veicolare e curricolare in sas iscolas. Como b’at de gastare 900.000 èuros, ma sas primas mesuras lompent como chi at coladu 22 meses dae sas eletziones e dae s’aposentamentu de sa Giunta. E duncas su sardu forsis at a torrare in àula in su 2016.
Su bandu de su sardu veicolare de ocannu no at funtzionadu comente si tocat. De sos 900 mìgia èuros istantziados cun sa finantziària 2015, petzi 652.762 los ant a impegnare como seguros a favore de sas iscolas pro fàghere unas cantas oras de sardu. Est una pertzentuale chi s’acostat a su 70 pro chentu, mentres s’àteru 30 pro chentu non s’ischit ite fine at a fàghere. In sa detèrmina de su servìtziu editoria mancant sas iscolas privadas, duncas podet èssere chi su chi sobrat lu potzant impegnare a favore de custos istitutos. O finas a àteros istitutos a manera isperimentale. Ma semper in afannu, a s’ùrtimu momentu, sena tranchillidade.
Abarrat su datu polìticu chi non si podet lassare una limba, galu de prus una de minoria, duos annos a largu dae sas iscolas. CSU, e àteros sòtzios, aiant reclamadu in su 2014 de non truncare sos fundos iscolàsticos de sa limba e trantzire su dannu. Ma nudda: fàulas in sos giornales e in Cussìgiu.
Chi su bandu pro su sardu veiculare in sas iscolas aiat puntos dèbiles meda, l’aiat naradu e iscritu su Coordinamentu pro su sardu ufitziale ocannu prus de una bia. Sos cussìgios non los ant agradessidos. Su sòtziu de sos militantes de su sardu fiat lòmpidu a fàghere unu ricursu geràrchicu (finas fintu) pro dare a sa Regione sa possibilidade de si megiorare sena fàghere dannu cun ricursos prus atzudos (comente ant fatu sos de su tzìnema). Ma no est acuntèssidu nudda.
Né custa faina propositiva l’ant cumpresa.
Sos datos de sos finantziamentos de sos progetos iscolàsticos si podent lèghere inoghe in sa determinatzione de su diretore de su servìtziu
http://www.regione.sardegna.it/j/v/1725?s=1&v=9&c=389&c1=1346&id=48166
in ue s’agatant finas totus sas iscolas finantziadas e nono.
Ma a banda de sos detàllios de su bandu, copiadu dae unu aprontadu pro summas minores e duncas no adatu, su dannu prus mannu abarrat cussu polìticu_culturale: sa Regione no at una positzione pretzisa in meritu a cale sardu si depet insinnare in sas iscolas duncas s’at a andare a sa manera de su “fai da te”.
At a èssere unu matzinbròddiu de limbas, dialetos, variantes, còdighes e professionalidades de averguare, sena chi b’apat unu guvernu sèriu de sa polìtica linguìstica e unu cunfrontu sèriu cun chie si siat. Sos ufìtzios de sa Regione difatis, a dies de oe, detzidint totu sena si cunfrontare cun nemos. E sos linguistas acadèmicos, paris cun sos babbais de su ML, porrint a favore de custa lìnia de sas variantes, chi est a nàrrere “dialetale”.
S’ùnicu fatu positivu est chi su sardu at a torrare in sas iscolas. Custu istantziamentu lompet però pustis duos annos de bòidu totale de limba sarda in Sardigna. Una dannu mannu. Dae su 2009 difatis s’andaiat a in antis senza firmadas. Su 2014 e 2015 totu intreos no ant bidu peruna initziativa in su fronte iscolàsticu. In su 2013, sa Regione aiat gastadu 450.000 èuros. In su 2014 (primu annu de sa giunta noa) nudda. In su 2015, comente amus naradu, 900.000 èuros. Amus bidu però chi non sunt istados impegnados totus e duncas, de fatu, non sunt resessidos mancu a torrare a cuberare su chi non s’est istantziadu in su 2014. Pro como. Isetamus novas dae inoghe a sa fine de ocannu. Si podet impegnare difatis finas a su 31.12.
Crititzidades mannas cun unu dannu malu a medire. Bos imaginades una limba “normale” chi abarrat sena insinnamentu pro duos annos? E una limba dèbile comente su sardu? Unu betze dannu.
Sa continuidade est importante, ma sa discontinuidade de poderiu chi cheriant impònnere fiat meda prus importante, pro chie si chieriat aposentare, de su bene de sa limba nostra. E tando s’importante fiat a cambiare s agente chi bi traballait. Sena pensare a esperièntzias o a cumpetèntzias chi aiant semper sarvadu sas cosas e aiant “imbentadu” in su 2008-2009 su sardu veiculare in oràriu curricolare.
Làstima…
Leave a comment