Maninchedda proponet de dedicare sa 131 a un’eroe sardu. Deo so de acordu

– de Giuseppe Pepe Coròngiu –

Unas cantas dies como s’assessore de sos traballos pùblicos Pàulu Maninchedda at propostu de torrare a intitulare sa 131, su caminu prus de importu de Sardigna. Faeddende de apaltos, cantieris e Anas b’at istichidu in mesu custa proposta: nde tiramus su nùmene de Carlo Felice e la intitulamus a un’eroe de sa natzione sarda, Marianu IV o Giommaria Angioy, bastu chi siat.

Depo nàrrere luego chi a mie custa proposta m’agradadat e mi praghet a la pònnere in contu sena pregiudìtzios nen polìticos nen personales. Ca so semper istadu cumbintu chi sa toponomàstica, in chistiones de identidade natzionale, non siat mai neutrale. Duncas est una chistione de primore a pigare initziativas simbòlicas chi torrent a sos sardos su sentidu de un’istòria, de una “narratzione”, de un’identificatzione in unu caminu comunu.

Mancari finas sa segnalètica bilingue non diat a istrobbare. La gheto comente proposta de megioru a s’assessore.

Cumbinatzione: sa 131 est unu caminu, su caminu de primore in Sardigna. Duncas, at, fintzas pro resones istruturales, un’importàntzia chi est de badas a acrarire inoghe a chie si siat. Est su caminu chi unit sos sardos e sas duas  o milli sardignas partzidas dae s’autocolonialismu. Resessende a nde bogare su nùmene  de su tirannu savojardu Carlo Felice e torrende a pònnere su nùmene de un’eroe nostru si diat resessire a annoare sa mirada matessi de sos sardos a s’istòria issoro e a sa sèmida identificativa issoro. No est una cosa de pagu contu.

Apo bidu in custas dies unu dibàtitu grae. Chie est contra, chie pigat in giru. Chie narat chi Maninchedda est su sòlitu fraitzu chi proponet cosas pro istraviare dae àteru. Depo nàrrere chi custos argumentos non m’ant postu in aficu. Diat tènnere milli resones pro atragagiare s’assessore, su filòlogu e su presidente de su Partito dei Sardi, ma penso chi b’at chistiones, comente sa simbologia o semiòtica natzionale, chi sunt prus mannas de nois. Prus mannas fintzas de s’assessore Maninchedda. Prus mannas fintzas de sos polemistas mannos chi non podent bìdere a su polìticu de Macumere.

E si sa 131 est male cumbinada, si sos cantieris non si serrant mai o sa carregiada est isfossonada non b’intrat nudda. Su chi est de apentu, pro a mie como, est sa chistione de bogare a campu unu tretu de sas raighinas de s’identidade istòrica natzionale cun su nùmene de sos eroes nostros. Mi diat pràghere finas s’istatua de Carlo Felice de Casteddu a la pònnere in fines in unu museu e a nde pònnere un’àtera in cue in pratza Yenne. Unu monumentu a s’identidade de sos sardos.

Sa preferèntzia mia est pro Angioy. Ma si cherimus a Marianu IV est su matessi. Amus imparadu dae sas cuntierras de sa data de sa Die de sa Sardigna o de cale depet èssere sa limba iscrita comuna chi chie brigat pro s’una o pro s’àtera faghet dannu a sa càusa. Tando un’eroe si balet s’àteru comente una data o unu còdighe linguìsticu si balet a sa matessi manera. S’importante est chi bi siant.

Depimus gherrare pro custu? Non creo. Sa proposta est bona: su chi rechedet est a l’acumprire cun atos de guvernu. Deo, nois bi semus, finas si pro àteras medas cosas non semus de acordu.