Su Cussìgiu de sos ministros de s’Islovàchia at aprovadu mercuris coladu una proposta pro annànghere a sas limbas reconnotas de sas minorias finassu russu, chi unu tenpus fiat matèria obligatòria in sas iscolas, e su serbu. Sa detzione lompet a segus de unu invitu chi est arribadu dae sos comitados de espertos de sa Carta Europea de sas Limbas, unu tratadu internatzionale istituidu pro defensare e agiudare sas limbas de minoria e cussas regionales. S’Islovàchia at aderidu a sa Carta in su 2001.
Ponende mente a s’ùrtimu tzensimentu de su 2011, resurtant residentes in Islavàchia 1997 tzitadinos chi apartenent a sa minoria russa e 698 tzitadinos de sa minoria serba. Sos membros de custas minorias sunt isparghinados peri totu su territòriu e non lompemt sa cuota mìnima de su 15% de sa populatzione in cada distretu, chi est sa cunditzione de lege pro su reconnoschimentu in via ufitziale.
Cun custa atzunta, ant a èssere 11 sas limbas reconnotas comente minoritàrias o regionales in Islovàchia: bùlgaru, tzecu, croatu, polacu, rom, russu, rutenu, serbu, tedescu, ungaresu e ucràinu.
In Italia galu de s’aprovatzione de sa Carta non si nde ischit nudda.
(Fonte TSS- Slovacchia Oggi)
Leave a comment