– de Sarvadore Serra –
Fortza paris, limba sarda! Sas duas dies de Òschiri sunt istadas una proa manna de s’istima chi su pòpulu sardu tenet pro sa limba sua. Sala prena e interventos cualificados. Pessonagios pòliticos e tzitadinos ant dadu su cuntributu issoro de valore a una gherra paghiosa e de tzivilidade. Nois non cherimus prus chi su patrimòniu linguìsticu nostru nche lu pòngiant a un’ala. Cherimus chi su sardu tèngiat su logu chi li tocat in sa sotziedade. E sa matessi cosa cherimus pro sas limbas alloglotas, su catalanu, su tataresu, su gadduresu e su tabarchinu.
Custu addòviu nos ponet isperu e alligria. Ca su pagu cuidadu de una giunta regionale pagu atenta no at arressadu su movimentu linguìsticu. Amus mustradu chi sa punna pro su sardu ufitziale no est una violera de pagos intelletuales, ma su cumbinchimentu de totu unu pòpulu.
Dae custu mamentu tocat a torrare a ordimingiare s’impreu de su sardu in totu sos campos de sa sotziedade: amministratzione pùblica, mèdios de comunicatzione, retzas informàticas, iscola, promotzione de sa cultura in su territòriu, avvaloramentu de su patrimòniu istòricu e archeològicu.
Su Coordinamentu pro su Sardu Ufitziale, organismu pulsante e abertu, si ponet a disponimentu de totu sos chi cherent dare s’agiudu issoro in custa faina.
Cun sos mèdios modernos de comunicatzione, chie si siat podet leare cuntatos pro dare ideas e fàghere propostas. E chie si siat podet agiuare pro fàghere crèschere su sardu comente limba normale, iscriende artìculos chi tratent totu sos argumentos, dae sa sièntzia a sa polìtica, dae s’isport a sa religione, dae s’istòria a s’archeologia.
Tzertu no est fàtzile, ca semus totus iscolarizados in italianu. Tzertu, b’est su perìgulu de fàghere faddinas. Ma, de su restu, petzi chie non faghet nudda no isbàlliat. E in caminu s’acontzat càrrigu.
Bonu traballu a totus.
si amus conottu dae sos nostros mannos sa Limba sarda comente podimus faghere oe a non insistere a la faghere continuare a tramandare a sos nostros fizos e nebodes… son nostros rappresentantes in sardigna si deben rendere contu chi este ora… no este chi Cheren faghere comente an fattu in su tempus de sas chiudendas… tancas serradas a muru fattas a saferra aferra, si su chelu fiti in terra aian serradu chussu puru… nois insistimus de la tramandare i iscola…
Comibtzade a pretender chi in totu sos ufitzios publicos de cale si siat ratza b’apat una parte de su personale chi faeddet in sardu.