Su 26 e 27 de su mese de cabudanni, in ocasione de sa Die Europea de sas Limbas, s’at fàghere in Oschiri sa segunda editzione de sa Festa de su Sardu Ufitziale. Organizat, che a s’annu coladu, su Coordinamentu pro su Sardu Ufitziale, assòtziu rapresentantivu de su movimentu linguìsticu a favore de su bilinguismu e de s’istandardizatzione de sa limba sarda.
Sas duas dies ant bìdere in campu sos ativistas de su Csu, ma finas un’ammesturu de initziativas in una fòrmula noa chi bidet traditzionales mesas de arresonu polìticu e linguìsticu, cun mùsica, cantu, libros, archeologia, artisanadu, cultura e pràngios e chenas sotziales. Una manera, pro sos chi crèent a sa chistione de sa limba, pro si addobiare a pare e sighire a aguantare pro lòmpere a calicunu resurtadu pustis annos de cuntierra.
Sa manifestatzione comintzat sàbadu 26 in sa sede de sa Fundatzione Giuanna Sanna, in pratza de Monsignor Bua, a sas 16.00 cun s’introduida e relatas de sos rapresentantes de su CSU. A pustis b’at àere unas cantas testimonias in contu de sa chistione de sa limba in Sardigna cun esperientzias, poesias e contos. A sas 18.00 est in programma una mesa de arresonu de polìtica linguìstica cun esponenetes de livellu regionale. A sas 20.00, pro tancare sos traballos un’interventu in cantu e mùsica de sa cantante Carla De Nule. A sas 21.15, pro chie cheret, chena sotziale.
S’incras domìniga, a pustis de s’introduida de su CSU, un’àtera mesa de arresonu e testimonias de ativistas e persones impignadas in sa chistione de sa limba sarda. In congruida s’iscritura de unu documentu finale de imbiare a sa Regione in contu de ufitzializatzione de su sardu. A pustis pràngiu sotziale e bisita a su situ archeològicu de santu Istèvene.
Sa prima editzione de sa Festa de sa Limba Ufitziale si fiat fata s’annu coladu, semper in custas dies, in Sèdilo e aiaiat tentu una resèssida manna. Su Coordinamentu pro su Sardu Ufitziale est nàschidu in su mese de maju 2014 a pustis de s’intrada in poderiu de sa giunta Pigliaru.
Intro sas fainas acumpridas in pagu prus de un’annu de vida si podet regordare, in prus de sa Sa Festa, s’iscola de istade de Neunele de su mese de austu 2014, sa contracunferèntzia de sa limba sarda in su mese de nadale in Casteddu, sa proposta de lege linguìstica presentada in Cussìgiu Regionale cun su grupu Sardegna Vera, sa collaboratzione cun sos ispetores de su Cussìgiu de Europa pro s’aplicatzione de sa Carta de sa Minorias Natzionales. In prus deghinas de documentos e comunicados de istìmulu e denùntzia pro sa polìtica regionale.
Sa Festa de sa Limba Ufitziale de Oschiri at a èssere unu momentu de importu finas pro s’addobiare a pare e disinnare tempos e fainas noas in contu de sa limba nostra.
Sa Festa est aberta a totus sos chi bi cherent èssere.
