Sa lege 107/2015 (sa chi si narat “Buona Scuola” de Renzi-Giannini) at postu is insegnantes precarios in cara a sa possibilidade de imparare in una provìntzia o regione diferente dae sa pròpia, a tales chi siant istabilizados. Custu provedimentu at mustradu, una borta in prus, comente – in Sardigna – su problema de su reconnoschimentu de sa sogetividade diferente nostra respetu a s’Itàlia non siat una chistione chi cheret cuada pro non faghere timere a sa gente; a s’imbesse, est su presupostu chi andat postu in fatu pro ònnia batalla pro su benèssere de sa comunidade nostra.
Est ladinu chi su dotzente italianista sardu est postu in antis a una controida, bidu chi sighire a bidere sa Sardigna comente una parte indivisìbile de s’Itàlia signìficat chi no diat depere narrere nudda a pitzu de s’impreu suo in una Regione italiana cale si siat. Is 4000 dotzentes sardos pertocados dae sa controriforma de su guvernu PD ant manifestadu sa risoluta contrariedade pròpia a sa deportatzione issoro in sa penìsula itàlica, proite si sunt postu in mente sa ispetzifitzidade de sa situatzione pròpia e duncas cantu una lege giai dannosa pro totus is insegnantes, fatzat prus dannos contra de issos.
Custu at abertu una truncadura manna intra is insegnantes nostros e s’àrea polìtica chi est istada su riferimentu pro meda de issos. Intro custa ferta no si depet inserire su cualuncuismu o s’astensionismu ma su atuamentu de depere gherrare pro s’autodeterminatzione de sa Sardigna; custu cheret nàrrere trasformare su arrennegu e s’indignatzione giustas in una batalla pro s’iscola sarda, sa potestade legislativa autònoma in matèria de istrutzione. Custu depet èssere su traguardu de dotzentes e istudiantes sardos, pro si bogare unu Istadu basadu a suba de interessos angenos a cussos de is sardos e is controriformas de is guvernos de su duopòliu liberale italianu.
Est ladinu comente custa Giunta Regionale non siat bona pro nudda a ghiare custa batalla de importu, bidu chi no at ischidu mancu impreare is prerogativas chi tenet giai, ponende·si a tardu in pensamentu pro sa chistione e isceti proite is dotzentes dd’ant posta in apretu. Sa Giunta de su Partito Democratico – fintzas a cando est istadu possìbile – no at fatu nudda in defensa de su guvernu de s’Istadu italianu, cun su cale est ligadu dae interessos comunos. Unu de is slogan de sa protesta est istadu “Scuola Sarda, docenti sardi”; nos permitimus de ddu modificare cun “dotzentes in limba sarda”. Proite s’impreu de sa limba nostra depet èssere unu signu de apartenèntzia a sa nostra comunidade natzionale, cumentzende dae s’iscola, depet èssere funtzionale a liberare sa sotziedade nostra dae su cumplessu de inferioridade chi afligit is colonizados a partire dae sa divisione intra su limbàgiu superiore de su dominadore (s’italianu) e su limbàgiu bassu de su dominadu (su sardu) chi si diat depere italianizare semper de prus pro si realizare.
Sa chistione de sa limba puru ponet unu problema evidente pro su chi pertocat is deretos democràticos nostros, bida sa possibilidade chi potzant lòmpere in Sardigna is insegnantes italianos a is cales no est pedida peruna cumpetèntzia linguìstica comente no est pedida peruna connoschèntzia a pitzu de s’istòria nostra. Isperemus chi is insegnantes nostros ispieghent in sardu a is alunnos sardos issoro, imbetzes de impreare sa limba natzionale nostra comente forma de protesta si siant custrintos a emigrare in Itàlia. SCIDA pòmpiat is insegnantes sardos e at a sighire cun s’impignu suo pro s’Iscola Sarda, pùblica, làica, de calidade, in defensa de su deretu nostru a sa soberania in su territòriu nostru. –
Assòtziu Scida – Giòvanos Indipendentistas
giai publicadu in http://scida.altervista.org/iscola-sarda-dotzentes-in-limba-sarda/
Leave a comment