– de Bovore Mele –
S’Itàlia cun Sa Repùblica Primàrgia at àpidu una polìtica internatzionale sua. Chie non s’ammentat a su Ministru Andreotti de su cales cunfiaiant sos àrabos ca ischiant ca un’acòrdiu firmadu cun issu diat essere istadu onoradu. Fiant annos chi de custa polìtica non si nd’intendiat prus faeddare. Epuru custu Ministru de sas Relatziones Esternas Gentiloni cheret a lu sighire bene ca badde iscansat dae sos àteros, si movet depustis de aere pensadu, e custa est giai una grandu cosa, pro sa Libia fiat istadu diferente cun Frattini. Difatis a custos livellos no esistint pintaduras fortes ma fintzas sas prus lèbias pintirinadas a fias cherent averguadas.
Oe su chi est acaèssidu in Grètzia est curiosu ca Schauble, s’eternu ministru de s’economia tedescu, domandaiat sa sortida de sa Grètzia dae s’euro in pràtica la pensaiat belle che a su ministru de s’economia gregu Varufachis, est a narrere fintzas custu pediat s’essida de sa Grètzia dae s’euro o totu a su prus una sigunda moneda, sa drachma noa, de crobare a s’euro. Pariat ca fintzas su Ministru Primàrgiu de sa Grètzia Tzipras esseret de su matessi pàrrere e imbetzes, de pustis de aere fatu botare a sos tzitadinos arregos contra de sas cunditziones pro aturare in s’euro, seberaiat semper de aturare in s’euro ma a cunditziones peus de sas de in antis.
Ite podet aere influidu pro cambiare pàrrere su Ministru Primàrgiu gregu? Su F.M.I., Fundu Monetàriu Internatzionale, in antis fiat contràriu a s’acòrdiu e de pustis de su Referendum a bortadu a crou (bivio in italianu) de chentotanta grados e s’est cunvertidu in unu, ca emmo a cunditziones meda mègius de sas chi sunt istadas imponnidas a s’Ispagna e a su Portogallu. Est craru chi inoghe sos Istados Unidos, sos chi ant sa majoria de su dinare chi costituit su Fundu Monetàriu Internatzionale, apant dadu s’òrdine a sa Lagarde, su capu de su F.M.I., de cungiare deretu a cale si siat cunditzione fintzas istransende s’iscadèntzia de su dèpidu gregu de trint’annos.
Difatis sos Istados Unidos fiant isporados dae sa possibilidade chi sa Grètzia aeret cungiadu un’acòrdiu pro aere valuta dae sa Rùssia e dae sos paisos B.R.I.C.S. (Brasile, Rùssia, Ìndia, Tzina e Sud Àfrica) chi nos depimus ammentare sunt a pagu diferentzia de valore de Produtu Internu Brutu P.I.B. (in italianu P.I.L.) dae sos paisos otzidentales. Sa Grètzia cun sa Rùssia cheriat narrere pro sos Istados Unidos unu pee de sa Rùssia in sa Terra Manna Europea ,chi s’afatzat a su Mediterràneu cun unu càmbiu geopolìticu de importu in Europa.
E sa Germània, proite sa Merkel, sa Cantzillera, at àpidu unu pàrrere diferente dae Scauble, badde non b’at una resone ebbia e si podet ipotizare ca sa resone prus de importu siat istada s’arriscu chi s’esseret rebentadu su guvernu tedescu in ue s’aneddu dèbile est sa S.P.D., sos sotzialdemocràticos, pro ite ca sa base de custu partidu est semper prus isufrida de custa cantzillera e de sa polìtica econòmica sua. Custa fia sa Cantzillera e at fatu un’ischerta giusta.
Ma b’at peri un’àtera resone dèpida a su fatu chi sa Germània est una natzione poderosa, Berlinu, sa capitale sua, est sa tzitade cun prus turistas in Europa e nch’at isegoladu (superato in italianu) pro nùmeru de bisitadores fintzas a Roma. Difatis s’Intellighèntzia tedesca non cheret segare de su totu sas relatziones cun sa Rùssia e in custa ocasione sos interessos econòmicos non s’agualant cun cuddos de sos Istados Unidos e custa cosa cumintzat a pesare. Sa politica de sa Merkel, sighida in Europa assimìgiat meda a unu caragolu (morsa in italianu) ma sa fèrrina (filettatura in italiano) no aguantat prus a s’agarru (costrizione o morsa in italianu) de sa Merkel. In Germània in palas de su contone (angolo in italiano) de su cuartieri (isolato in italianu) si cuat unu guvernu nou ruju-ruju e birde est a narrere sotzialdemocràticos de sa S.P.D., s’ischerra (la sinistra in italianu) de sa Die Linke e Birdes e sa Merkel est isporada dae custa possibilidade semper prus probàbile de essere ponnida in minoria de pustis de sos urtimos risultados eletorales negativos de su partidu suo sa CDU sos democristianos.
Ma tando custos movimentos de protesta comente a Podemos, a Siriza de Tzipras in Grètzia e a su Movimentu Chimbe Isteddos in Itàlia chie los cheret e chi los at finantziados? E si ant resone tzertos analistas comente Mauro Bottarelli, de su diàriu on line italianu “il Sussidiario”, chi narat chi sunt istados chertos dae sos ingresos e dae sos americanos e chi los ant finantziados sos finantzieris internatzionales, comente George Soros, chi cherent petzi trèulu in Europa, pro balangiare dinare ispeculende? E si sas fortzas economicas in palas sunt gasi poderosas proite su disinnu de nche bogare sa Grètzia a foras de s’euro no est resessidu?
Badde ca sos Istados Unidos totu de unu prontu ant disinnadu de firmare sa carrera de sa Grètzia foras de s’euro ca sa diretzione fiat cara a sa Rùssia! E Tzipras ite rolu at giogadu? Unu sinnale de atrèmpiu (riferimento in italianu) est siguramente sa discunfiantza de Putin chi non s’est isbrennanculadu (sbilanciato in italianu) meda cun issu ca non si fidaiat, badde ca lu pensaiat pagu firmu o, pro pensare male, unu pagu ingulimadu, in italianu diamus narrere “volubile”.
Calicunu podet pensare pro su chi so iscriende “e innorabonas a bastare siant totu custos inghirimolos (rovelli in italianu)!” ma a custos bastat a lis ammentare de averguare sos sondeos de Podemos de oe in Ispagna chi est in caida lìbera e est torra su de tres partidu de pustis de su Partidu Sotzialista Obreri de Ispagna e de su Partidu Populare. Chissai chi su pòpulu non siat pensende “pro aere trailadores (ingannatori in italianu) noos mègius nos collimus sos betzos”.
Leave a comment