– de Mari Rosa Catte –
Novas bonas dae sas àteras comunidades linguìsticas, semper malas in logu nostru. In Friuli sunt abertas sas iscritziones a sos cursos de formatzione pro insinnantes de sas superiores cun su sistema CLIL pro sas limbas de minoria e s’alfabetizatzione in limba friulana. Faghet totu sa “Lavagne Plurilengal”, chi est una rete de istitutziones culturales e iscolàsticas chi òperant in Friuli e chi si impignant pro sa promotzione de su plurilinguismu e sa tutela de sa limba friulana cun una bisione multiculturale e europea, cun su sustegnu de s’ARLeF, S’Agèntzia Regionale de sa Limba Friulana.
S’organizatzione at ammaniadu duos cursos de formatzione pro insinnantes de sas iscolas superiores cun sa metodologia CLIL pro sas limbas minoritàrias e de sa prima alfabetizatzione in limba friulana e chi s’ant a fàghere a comintzu de s’annu iscolàsticu 2015-16.
In su cursu de prima alfabetizatzione, cun su dotzente Franco Finco (universidade de Rijeka / Fiume) si comintzat dae sos cuntzetos de grafia ufitziale e limba istandard (azicu tostos in Sardigna). S’àteru cursu est in CLIL, chi cheret nàrrere chi pro insinnare sa limba de minoria si depet impreare sa limba matessi faeddende-la totora a letzione. Sa chi sos catalanos li narant “immersione linguìstica”.
Bastat a pensare a su chi est capitadu in custos annos in Sardigna pro annotare cantu semus a tesu dae una minoràntzia linguìstica normale. Pro sa limba istandard semper a revessu, comente chi siat unu machine malu de chie la pràticat e non una cosa normale pro una limba a àere una grafia ufitziale.
Pro insinnare su sardu in sardu bastat a pensare a sas brigas de s’universidade de Tàtari contra a su servìtziu limba sarda de su biadu de Pepe Coròngiu pro cumprèndere chi sos inimigos de su sardu esistint, e non sunt a tesu meda. Brigas chi aiant firmadu FILS, sos cursos pro formare sos insinnantes de sardu. Giai fatos duncas in logu nostru mentres sas àteras minorias sunt ponende fatu.
Ma como in Regione non b’at problema. Peruna polèmica e sunt trancuillos. Non sunt faghende nudda in custu setore, Si moent petzi cando su Coordinamentu pro su Sardu Ufitziale essit in su giornale o Limba Sarda 2.0 los iscàndulat.
Mancu male chi nessi issos bi sunt.
Leave a comment