Presidente preclaru
Su Coordinamentu pro su Sardu Ufitziale espressat su pedinu suo prus mannu pro s’istadu presente de sa polìtica linguìstica regionale chi est frimma. Non sunt bastados 16 meses a su guvernu pro mustrare cale est sa lìnia sua e cale est su progetu pro sarbare sa limba sarda fundende una polìtica linguìstica de profetu. In sos ùrtimos meses, sas cosas sunt andadas in pejus cun s’iscumparta de su sardu dae sa programatzione de sa Sede Rai Regionale. Dae belle 60 dies sas trasmissiones radiofònicas in sardu si sunt frimmadas, mentres sa polìtica faghet finta de nudda.
Est unu dannu mannu pro su status de sa limba nostra e pro sa difusione sua cun una pelea mala a cumprèndere pro chie at a coro sa sorte de s’idioma pròpriu de sa Sardigna. Sos ispàtzios radiofònicos in sardu fiant un’apuntamentu fissu dae su 2008, cando los aiat promòvidos sa Giunta Soru, e rapresentaiant unu de sos tretos prus avantzados de unu traballu de avaloramentu e iscoberta noa, a manera moderna, de sa limba, garantidu finas dae su guvernu Cappellacci.
Sa cantzelladura, pro resones chi pro sos tzitadinos sunt assurdas, sunt unu vulnus chi non si podet bajulare pro chie credet in sa normalizatzione de sa limba pròpria de sa Sardigna.
Su CSU, duncas, pedit a Vostè su Presidente de sa Regione, un’interventu apretosu e forte pro acontzare custa chistione torta e dannàrgia. Est pro de badas difatis a reclamare sa ratìfica de sa Carta Europea cun sa crèschida de sos livellos de protetzione de su sardu, o prerogativas majores in contu de normas de atuatzione de s’Istatutu Ispetziale, si posca sa Regione etotu non faghet su dovere suo in polìtica linguìstica, e prus in particulare, non garantit sas cunventziones chi aiat giai in èssere pro s’impreu e sa visibilidade de sa limba.
Su guvernu regionale, a parre de su CSU, diat dèpere dare sinnales de vida urgentemente, o sos dannos cajonados dae custos 16 meses, a pustis de deghe annos de traballu tostadu e de profetu a manca comente a dereta, non s’ant a pòdere prus acontzare.
A sa chistione de sa RAI difatis, cussa prus evidente, si nde agiunghent paritzas àteras. Su pagu dinare postu pro sa limba sarda (su 0,025% de su totale de su bilantzu), s’arressamentu de s’insinnamentu de su sardu in iscola (lege 3/2009), s’acorpamentu e su declassamentu de su servìtziu regionale limba sarda, su Pranu Triennale iscadidu dae duos annos, s’Osservatòriu chi non si cònvocat, s’aoramentu e s’abandonu de progetos comomai ismentigados (ALiMuS, Bilinguismu Creschet, Tradùere pro crèschere, Camilisa, Cros, FILS, FOLS e àteros), sa Cunferèntzia Annuale chi non si faghet, s’ausèntzia de su sardu in su progetu Iscol@.
In prus su CSU denùntziat sa tentada fitiana de imbordulare e ismentigare sa LSC, sa limba iscrita ùnica regionale, e una punna sighida cara a sa dialetizatzione e sa folclorizatzione de sa polìtica linguìstica. Pro su chi pertocat sos interventos finantziàrios pro iscola, sos ufìtzios linguìsticos, o sas atziones pro sa Carta Europea e sas normas de atuatzione de s’Istatutu, semus firmos a sa polìtica de sa promissa in su giornale, ma nudda de cuncretu galu. Sollitzitamus su presidente Pìgliaru isperende chi sas cosas potzant cambiare.
Timimus chi bi potzat àere sa tentatzione pro sa Regione de sostituire una polìtica de sistema e difusione in su territòriu amodada cun sos operadores, cun una episòdica e propagandìstica, posta in manos de imprendidores, fata de eventos efìmeros comente festas e festivals chi, sa die in fatu, ant a lassare comente est (sena lu tocare) s’istadu dannàrgiu de su sardu.
Casteddu, 13 de làmpadas 2015
Su Coordinamentu Sardu Ufitziale – Assemblea Diretiva
Leave a comment