Seighi meses non sunt bastados a sa Giunta Regionale a comintzare su de tres annos de su Cursu Bàsicu de Sardu, cursu de alfabetizatzione in lsc chi si faghiat in Casteddu e Tàtari. Partidu in su 2013 cun una grandu renèssida, a incuru de s’Ufìtziu Linguìsticu Regionale, dae cando est arribbadu su guvernu Pigliaru non si nd’at intesu prus nudda.
E puru in s’apaltu assignadu s’annu passadu pro s’isportellu regionale a sa sotziedade Sa Bèrtula Antiga, su cursu l’aiant prevèdidu cun belle 200 oras de insegnamentu, partzidas intre sa capitale sarda e sa tzitade turritana. In sos primos duos annos de letziones, fatas segundu su Cuadru Comunu Europeu de Riferimentu, si fiat operadu cun duos livellos: A1 (su prus elementare) su primu annu e A1 prus A2 su segundu. A sos de tres, si diat àere depidu fàghere custos duos e in prus su cursu B1, semper unu livellu prus elevadu finas a lòmpere a C1 – C2, chi sunt sos prus artos, in sos annos imbenientes.
In tamen dae arburada Trento de Casteddu, dae freàrgiu 2014 finas a como, perunu novidade pro una faina chi est importante meda pro ite adduit a intrare in sa formatzione de sos mannos, o adultos, chi est sa base pràtica e de cunsensu de cada polìtica linguìstica.
Formende sos adultos chi no ischint iscrìere, e a bias mancu faeddare, si illargat su tundu de sas persones chi si interessant a sa polìtica linguìstica e si fràigat una base de cunsensu manna pro totu sas atziones linguìsticas chi si podent pònnere in campu. Sa duas tzitades sardas aiant respostu bene a s’initziativa regionale cun unu muntone de iscritziones (unas 150) chi ant cunfirmadu sa bonidade de s’idea.
Ma, torrende a su contu, sa Regione posca sos primos duos annos s’est frimmada e unu traballu chi baliat comente “pilota” e chi si depiat ismanniare a totu sa Sardigna (finas cun s’agiudu de istitutos, entes e assòtzios) como imbetzes est arressu paris cun unu muntone de àteras cosas. Est de badas a nàrrere chi cando nche mancat sa “continuidade” didàtica finas su traballu giai fatu est mesu pèrdidu.
Su lìmite prus mannu de cust’amministratzione est chi non faghet meda. Ma su dannu mannu est chi non faghet pro fraigare, costruire, ammaniare unu sistema, una retze, unu movimentu, una base de sa polìtica linguìstica. No at una visione generale, unu progetu. Est situatzionista. No at seberadu una lìnia. Si preferint initziativas spot e episòdicas comente sa Die ispetacularizada o su festival de sa cantzone minoritària. Initziativas de pagas dies chi serbint a pònnere unu tìtulu in su giornale e a fàghere propaganda e gazosa.
S’incras però, cungiadu su sipàriu e istudada sa mùsica, sa limba sarda at a èssere semper a su matessi puntu.
Chissai chi como CU.BA.S non torret a comintzare.
(red)
Leave a comment