A Cabuterra s’apaltu de s’ufìtziu limba sarda torrat a su sòtziu Sa Bertula Antiga. S’aministratzione comunale, chi aiat pèrdidu unu dibatimentu in su Tar, est istada custrinta a torrare in segus a sas detzisiones suas. Sa protzedura chi aiat cunsignadu s’apaltu in manos de su sòtziu Sarda Itinera Onlus de Istèvene Meloni est istada annullada a manera cumpleta. Su sòtziu Sa Bertula Antiga, chi est afidàbile e unu de sos mègius de sa polìtica linguìstica, at giai firmadu su cuntratu e est giai treballende in su su Comunu cun s’operadore Giuseppe Orrù.
Non si frimmant però is polèmicas in sa bidda a prope de Casteddu. Su cussigeri comunale Christian Ruju sighit a mandare a dae in antis sa batalla sua pro abèrrere sa politica linguistica de Cabuterra a una mirada prus manna chi pòngiat in contu su sardu comente limba normale de totu sa Sardigna e non petzi de unu dialetu locale. In particulare, su grupu consiliare de sos Rossomori, chi tenet como s’assessore cumpetente, s’oponet a custa idea mandende semper a dae in antis su programa de Oreste Pili, esponente polìticu Rossomori, chi como no est in Giunta nen in Consigiu, ma a cantu paret est a tretu de disinnare sa politica linguìstica de sa bidda. Sa punna de Pili est a partzire su sardu in duas dialetos: logudoresu e campidanesu.
Su Tar Sardegna aiat annulladu sa gara de apaltu de agiudicatzione de s’ufìtziu de sa limba sarda cun sa sentèntzia nùmeru 00293 de su 14.01.2015 chi aiat acasagiadu su ricursu de s’assòtziu Sa Bertula Antiga e annulladu sa determinatzione cun sa cale su comune aiat declaradu binchidora sa ditta Sarda Itìnera Onlus de Stefano Meloni. Siat su comunu chi Sarda Itìnera sunt istados cundennados a pagare € 2500 èuros peròmine de gastos legales.
Su comunu, in sa protzedura de afidamentu de s’apaltu, aiat reconnotu a Sarda Itìnera elementos de capatzidade tècnicu-professionale chi non li pertocaiant. Difatis, su bandu prevediat chi, in sos annos, 2012-15 sa sotziedade depiat àere giai gestidu nessi 7 progetos. In tamen su Tribunale Amministrativu Regionale at tzensuradu Sarda Itinera ca in sa declaratzione fata dae s’assòtziu chi pertocaiat <su de àere gestidu contemporaneamente sete ufìtzios de sa limba sarda> no est istada capatza de lu proare.
In s’oferta de Sarda Itinera Onlus si atestat finas chi at gestidu 10 isportellos. Gasi chi, comente in tamen resurtat in sos atos, sos ufìtzios gestidos sunt petzi 6. S’oferta de Sarda Itinera Onlus, pro su comune, at bintu e depiat in tamen èssere escluida pro difetu e farta de sos rechisidos de capatzidade tècnica e professionale rechestos dae su matessi bandu de gara fatu dae s’amministratzione.
A s’època de s’apaltu, un annu como, assessore de sa limba sarda fiat Salvatore Lai (Rossomori), alleadu polìticu de Pili, chi como no est prus assessore. A sa fine s’aministratzione at reconottu chi sa protzedura non fiat regulare e, torrende s’apaltu a sos legìtimos binchidores at istransidu su perìgulu de un’àteru pretu pro dannos emergentes eventuales.
Leave a comment