de Giuseppe Pepe Coròngiu –
Istrumentalizare sa polìtica linguìstica non pagat. L’at cumpresu finas Enrico Lobina, cussigeri comunale comunista de Casteddu, chi at iscritu in custas dies, in su blog suo, unu paru de auto da fè in ue, faeddende de Sa Die de sa Sardigna e limba, faghet autocrìtica.
Ite iscriet (in italianu, ca est sa limba chi impreat a fitianu) si podet agatare inoghe
Si chèsciat Lobina de issu e de sos amigos suos ca no ant cumbinadu nudda. Ant fatu una bella gherra contra a sa positzione unitària de sa lsc, ma posca chi ant partetzipadu a ruinare totu, como non resessent a fraigare un’alternativa. Cosa chi in medas ischiant e naraiant cando sa gana de distruire fiat prus manna de totu.
In custos annos Lobina, s’est impitzadu de limba sarda in Casteddu cun positziones filo separatistas e anti lsc. Un’esempru, a bisu meu, de comente s’aficu nou pro sa limba finas in neòfitas urbanos chi amus creadu in custos annos in tzitade siat isvanessidu, comente prevèdidu, in su nudda de sa polèmica anti standardizatzione e anti unificatzione. Pro non nàrrere in s’esaltatzione de unu folclore sena alenu e benidore. Un’ocasione, pro Casteddu, pèrdida.
A Lobina, chi comente persone pro a mie est dignu e geniosu in totu, tocat de dare atu chi s’est impitzadu in su consìgiu comunale de Casteddu pro sa limba sarda (o pro sos dialetos de a probe?), ma semper cun initziativas propagandìsticas sena cras pro leare unu tìtulu in su giornale o pro si nche pònnere in mèria, non pro fraigare una polìtica linguìstica verdadera. Vìtziu de polìticos medas pro sa limba.
E tocat a nàrrere finas chi, paris cun cosas positivas, cando s’est amigadu politicamente cun gente negativa e distrutiva at fatu petzi dannu a sa polìtica linguìstica, a su traballu fatu e a sas persones. At dadu agiudu a ideas e grupos minoritàrios chi ant trasformadu su traballu de afortiamentu de su sardu in una cuntierra sighida contra a s’istandardizatzione. Sena mancu prodùere alternativas de balia. Custa cumbata sena prospetiva at partzidu su Movimentu Linguìsticu chi est como prus dèbile e aministradu dae sos innimigos suos, mentres cun s’unidade podiat parare fronte. Su beranu de sa limba sarda in Casteddu, chi pariat acumpridu un’annu o duos como, est belle finidu ca custos polemistas, apogiados dae Lobina, a banda su fele anti lsc, no ant nudda de livellu nen de culturale de propònnere. E duncas finas issu tenet calicuna neghe de s’imobilismu e de su nudda presente. Pro ite si chèsciat cun is àteros?
Sas peleas de Lobina non sunt ispetziales e non penso de iscrìere grandu novidades narende chi sa semida (sua e de àteros mesches in Casteddu) est un’àteru capìtulu de sas dificultades sempiternas de sa manca urbana casteddaja e urbana a cumprèndere finas a fundu e intramentare sa chistione linguìstica. Massimamente sa chistione de s’unidade linguìstica de non bèndere pro chistiones de campanilismu tontu. Sa resistèntzia de custos ambientes a unu bilinguismu sardu normale est semper presente comente in sos maistros malos de sos Annos Setanta e Otanta.
S’ùnica diferèntzia est chi como, cuscientes o nono chi siant, sa gherra a sa limba sarda normale la cumbatent dae a intro a su movimentu linguìsticu. A un’ala si acrèditant comente amantiosos de sa limba, a s’àtera ponent su 90 pro chentu de sas energias pro frimmare s’istandardizatzione. De fainas positivas nudda. Cun su resultadu de lòmpere semper a s’impasse comente cussu de como. Ca a suta de s’ostilidade a s’istandard e de sa presunta defensa de su ‘casteddaju’ o de su ‘campidanesu’, b’at semper sa dificultade intelletuale a bìdere su sardu comente a limba e non comente a dialetu cantonale o munitzipale. E in custu, in sa manca sarda urbana, su biadu Girolamo Sòtgiu est semper in pinna de bentu cun sos imparos suos.
Su sustènniu a sa polèmica betiosa contra a sa LSC, a comitados estremistas e inesistentes comente Bilinguismu Democràticu o a cussigeris anti lsc comente a Paolo Zedda (chi aiat promìtidu degollos una bia eletu e s’ùnica cosa chi at fatu est a mòrrere su servìtziu limba sarda) no at pagadu. E difatis Lobina, paret pensende pròpiu a Zedda cando iscriet:
“Ed anche sulla lingua, a livello sardo, diciamoci che in questo anno passi in avanti non ne abbiamo fatto. La legge che doveva essere approvata non è stata approvata, il servizio lingua sarda è stato classificato come “poco importante” e fuso con un altro servizio.
A fronte di un impegno ed un’impostazione anche corretta, i dati oggettivi, non positivi, rimangono”.
Nois ite podimus congruire? Chi custa gente bi podiat pensare in antis de truncare su movimentu linguìsticu (e chircare de isolare sos chi ant semper traballadu) ponende in fatu a ideas macas e a persones negativas. A ite serbit sa polìtica si no a mediare? Pro ite pònnere mente a persones e ideas distruidoras? Cale fiat e est sa punna? Pro ite dare s’idea linguìstica de Casteddu comente a bidda de campidaneddu e non comente sa Capitale de totu sos sardos?Como semus totus prus dèbiles finas pro more de custos sèberos e custu non podet èssere perdonadu.
Ma nois de sa Lsc amus fatu e amus a sighire a fàghere sende chi no est pretzisu a lassare sa limba sarda in Casteddu in manos de gente chi no at cumpetèntzias nè amore pro su sardu. In manos a chie la cheret petzi ‘usare’ pro àteros fines. Forsis finas eletorales passados e imbenientes.
Leave a comment