Cras 21 freàrgiu in totu su mundu si festat sa Die de sa Limba Materna. In cada logu foras dae sa Sardigna però. Difatis, no est lòmpida peruna nova chi nessi una istitutzione, iscola, universidade o comune apat organizadu manifestatziones pro regordare custa bella die.
Non faeddemus posca de sa Regione gasi narada “Autònoma” de Sardigna chi si nde depet èssere ismentigada de sa chistione o forsis, pro sa gente chi b’est como a si impitzare de limba, non l’at mai nemancu ischidu.
Sa Die est fissada a custa data ca regordat su 21 freàrgiu de su 1952 cando unos cantos istudiantes de s’universidade de Dacca in Bangladesh los aiat mortos sa politzia pakistana sende chi si chesciaiant e manifestaiant pro s’impositzione de sa limba urdu in terra bengalesa.
Dae unos cantos annos tando, pro aficu de s’Onu e de s’Unesco, e finas de àteras organizatziones internatzionales, custa die est istada dedicada a ammentare totu sas peleas chi in su mundu sufrint sas limbas mamas chi no ant s’amparu chi meressent.
Su sardu est una de custas. E, naramus sa beridade, arriscat a beru de si nche ispèrdere. Su fatu chi nemos, a livellu istitutzionale, si nde siat ammentadu de sa festa mustrat a totus a ite puntu semus lòmpidos. Sa timoria, belle una seguresa, est chi siat in atu un’òbera de distruimentu e mutzadura de totu cussu chi s’est fatu in custos annos. Si cheret torrare totu sa chistione de sa limba a sa dialetizzazione e folclorizatzione.
Su Movimentu Lìnguisticu in custu est partzidu e male assentadu. Medas sunt in fide bona ca no ischint ite genia de matzones amus in Sardigna. Ateros pensant de leare profetu pro issos o sa fatzione issoro dae su disacatu de chie la pensat diversamente afutendesi.nde de sos dannos fatos a sa càusa. Ma a fundamentu b’est su traballu pensadu e mandadu a dae in antis dae cussas èlites dirigentes e acadèmicas antisardas chi connoschimus bene.
Sunt in pagos a aguantare contra a custa gherra fritta, muda e demagògica (chi est a manu tenta cun s’incumpetèntzia) ma nos intendimus de nàrrere chi Limba Sarda 2.0 e su Coordinamentu Sardu Ufitziale lu sunt faghende.
Sighimus gasi su tempus at a cambiare.
A novas.
gpc
Leave a comment