de Giuseppe Pepe Coròngiu
Paritzas novidades in custu ùrtimu fine de chida. S’eletzione de Soru a segretàriu regionale de su PD est comintzende a prodùere efetos. Sos bisos de glòria e de martza triunfale de su partidu de sos talebanos contra a sa Lsc parent chi siant giai in abbas malas.
Sas paràulas de su presidente Pigliaru in Radiolina chenàbura colada a mangianu sunt istadas craras meda. In s’Unione In Diretta, trasmissione ràdiu a incuru de Paola Pilia e Alberto Urgu, a pregonta de unu ascurtadore at naradu:
“La Lsc è lì, esiste e continuerà a svolgere il suo ruolo come è definito dalla legge”
A primu ghetu paret chi Pigliaru apat cambiadu lìnia dae sa campagna eletorale, cando l’aiant fatu iscrìere in su programma chi fiat in favore de sas variantes-dialetos, ma de seguru at a tocare a cumprèndere mègius s’istrategia e su progetu. Sena minimare su fatu chi, a banda sa timòria de Soru, sa furriada de su Presidente est semper e cando una conchista de s’apretu de su CSU de custos meses.
Ma custa declaratzione in aparèntzia in favore a sa LSC pòdet èssere finas un’iscòticu pro no allarmare su Movimentu Linguìsticu e prus che àteru pro lassare a chietu a Renato Soru. Su giai presidente de sa Regione, in Sèdilo, unu mese a como, aiat aghiadu unu messàgiu craru de defensa de sa creatura sua, su standard de sa limba sarda. E l’aiat fatu a un’addòbiu filo Csu dende unu messàgiu craru. Mègius a non lu provocare.
De seguru però custa essida de Pigliaru at postu in crisi sos chi isperaiant de si liberare de sa Lsc e de pònnere a ufitziale sa dòpia norma campidanesa-logudoresa. E lis at a carchi manera iscontzadu su giogu ammaniadu finas a como. E Pigliaru no at faeddadu mancu de emendamentos o revisione de sa norma. E calicunu at sighidu a tìmere e est in pistighìngiu.
Difatis, semper chenàbura a merie, su tonu de sa manifestatzione aparitzada dae sa Fondazione Sardinia pro cuntrastare sa polìtica de su CSU, e agiudare sos soberanistas in dificultade, fiat lenu meda. Ma finas ipòcrita. Ant faeddadu de fraternidade, diàlogu e paghes personàgios comente su cussigeri Rossomori Paolo Zedda, o su polemista Oreste Pili, chi in custos annos non ant fatu àteru chi cuntierrare (finas a manera personale) contra a chie crèet a s’unidade sardu. Como chi depent guvernare (e paret chi ormai sa polìtica linguìstica siat in sas manos issoro e non de SEL) ant bisòngiu de trancuillidade. E pedint sas paghes a sos chi ant semper istrobbadu. Lògica curiosa.
Sas propostas si connoschiant giai. Sa promissa de unu muntone de dinare pro su 2015, una lege pro s’iscola, un’albu pro sos ufìtzios, un’interventu in s’istatutu è una motzione pro sa ratìfica de sa Carta Europea.
Pro como de segura b’est petzi custa ca est gazosa chi non costat nudda. Pro s’àteru s’at a bìdere. Ca totu si giogat cun su dinare, sena su cale non b’at aère cunsensu de unos cantos chi ant atzetadu de dialogare.
Ma deo non creo chi Zedda & Co ant a renuntziare a s’idea de neutralizare sa LSC. Est s’ossessione issoro e carchi cosa s’ant a imbentare pro fàghere colare sa dialetizatzione folclorìstica de sa limba sarda chi ant in conca. Cun s’agiudu mancari de carchi acadèmicu.
In su mentres sa pantàsima de Soru sighit a istrobbare su sonnu de Pigliaru e de sos soberanistas non pro sa limba ebbia.
Leave a comment