Documentu polìticu de fràigu de su comitadu de istudiantes contra s’ocupatzione militare de sa Sardigna – Casteddu
Su comitadu de is istudiantes contra s’ocupatzione militare de sa Sardigna (Casteddu) est nàschidu dae su bisòngiu de fraigare unu logu inclusivu e orizontale in ue is istudiantes de onnia ordine e gradu si potzant addobiare pro faeddare e si organizare. Unu comitadu arraighinadu in is iscolas e in is facultades chi si pòngiat intro de su moimentu sardu ma in una visione de traballu in su territòriu, bidende in is tzerachias militares de Casteddu e lacanantes su obietivu printzipale suo. Unu comitadu chi siat, però, bonu puru a essere furriadòrgiu in is moimentos de pelea chi ant a bi essere in is logos in ue b’ant is polìgonos.
Ponende·si in su moimentu de pelea contra s’ocupatzione militare, su comitadu bidet in is tres puntos essidos dae s’assemblea de su 4 de Ladamini in Santa Justa, puru sa lìnia sua: stop esercitatziones, serrada de is polìgonos, bonìficas. In prus si rivendicat sa pràtica de sa segada de is retzas chi in sa manifestada istòrica de Capo Frasca at permissu a su pòpulu sardu de torrare a si pigare una parte de su territòriu suo, chi in meda annos no at pòdidu controllare. Comente mèdiu in prus de su comitadu pensamus chi siat pretzisu a sustennere su blocu dae su bassu de is esertzitatziones, chi sighint mancari is protestas.
Comente espressione de sa cumponente de is istudiantes, denuntziamus comente is investimentos a su welfare de s’istrutzione siant proportzionales a s’imbesse cun cussos destinados a sa defensa e comente sa collaboratzione intra s’Universidade de Casteddu e de Tatari e is aparatos militares, inghitzada pro cunsentire s’espansione e ricunversione de polìgonu interfortzas Sartu de Chirra, siat s’ennèsimu ricatu formativu-ocupatzionale in antis a is esigèntzias reales de isvilupu chi non podent previdere àteras cosas chi non siant bonìficas de is àreas pro mèdiu de personale ispetzializadu.
Pensamus in prus chi su comitadu siat un’aina ùtile de pelea, pro custu auspicamus sa nàschida de comitados gasi in su restu de su territòriu sardu
(bortadu dae Andria Pili)
Leave a comment