Isetende sa manifestatzione de Casteddu de su 13 de Nadale, su movimentu contra a sa militarizatzione istràngia de sa Sardigna s’est addòbiadu eris in massa in Làconi. S’ocasione fiat sa de trèighi ‘Martza pro sa paghe’ organizada dae ‘Sa mesa pro sa paghe’ e dae sas comunas de Làconi, Nuragus e Gesturi.
A mangianu, a oras de sas deghe, assemblea dibàtitu in su tzìnema Fabrizio de Andrè in Làconi. At abertu sos traballos Antonello Murgia (ANPI) paris cun Paolo Pisu, sìndigu de sa bidda de su Sartzidanu. “Pro sa gherra contra a s’ocupatzione militare – at naradu Franco Uda, segretàriu regionale ARCI – depimus meda in custos ùrtimos annos a su movimentismu indipendentista”. Padre Massimo Robol, missionàriu combonianu, at acraridu chi “custa est finas un’ocasione de liberatzione pro sa Sardigna dae sas infrastruturas e bases militares”. Fawzi Ismail, palestinesu, at faeddadu “contra a Israele e sos amigos de Israele in Sardigna ca sos israelianos benint a inoghe e distruende s’annestrant a distrùere in aterue”. Mariella Cao at atragagiadu a su presidente de sa Regione Pigliaru chi cheret “fàghere sa Sardigna atzionista (cun regione e universidade) de su polìgonu de Chirra mudende su nòmene, a manera fraìtza, in Polu industriale-culturale e de ricerca”. Pietro Arca, sìndigu de Sorradile, at criticadu a sos prefetos chi permitit sas esertzitatziones in su lagu Omodeo.
Posca Otavio Olita e Giacomo Meloni, at faeddadu Giuseppe Corongiu (Coordinamentu Sardu Ufitziale) chi at contadu de sa perigulosidade de sos ‘polìgonos culturales’ colonialistas chi a bias sunt prus perigulosos de cussos militares. At fatu un’arresonada de coro Domenico Pilloni, babbu de unu sordadu chi s’est immaladiadu de tumore. Sìncheru, comente semper, Bustianu Cumpostu :”Sa Regione est una parte de s’istadu chi non renesset a isòrvere custu problema ca custu problema est contra a sos interessos de s’istadu. E duncas nos depimus afidare a sa gente”. Roberto Cotti, senadore Cinque Stelle, at propostu unu documentu de lege de initziativa popolare pro su disarmu. Gianfranco Sollai at informadu chi cada tzitadinu pòdet presentare una denùntzia contra a sas bases pro perìgulu a sa salude. Totu difensivos e turmentados sos interventos de Gavino Sale (Irs) e Roberto Pizzuto (Sel), cussigeris regionales guvernativos, chi ant chircadu de defensare s’atzione dèbile de sa Giunta Pigliaru e su ‘pesu’ issoro intro de una majoria ‘chi non la pensat che a custu movimentu’.
Ant arresonadu finas Mario Loi, maistru pacifista, Giovanni Bellisai, Movimentu non violentu, e Ettore Canavera chi at tancadu sa chistione cun unu meledu subra ‘s’informatzione pilotada comente prima arma de gherra’. Pustis de unu ismùrzu in su Parcu Aymerich, a mèrie martza dae Nuragus a Gèsturi a suta de s’abba pròina. Festa cun serrada in sa pratza de sa bidda de sa Giara. E como totus a Casteddu su 13 de nadale pro sa ‘cramada manna’
