Peruna garantzia de currègere sos trincos in assestamentu de bilàntziu, peruna nova subra su diretore de su servìtziu, peruna positzione positiva in contu de LSC e unu muntone de disìgios bonos pro su tempus benidore. Custu in curtzu est su chi est resurtadu dae s’addòbiu aparitzadu eris in sa biblioteca regionale ‘G.Lilliu’ dae s’assessora de sa pùblica istrutzione Clàudia Firino cun sos titulares de sos ufìtzios linguìsticos.
S’assessora at cunfirmadu ca s’assestamentu de bilàntziu at a truncare belle totu sos istantziamentos pro sa limba pro su 2014 e at rimandadu a sa finantziària 2015 un’interventu importante. No est istada a tretu de cunfirmare a sos operadores si sas integratziones a sos isportellos sunt istadas sarvadas dae su Cussìgiu Regionale. Ma no at mancu iscobiadu chi, a mangianu in Cussìgiu Regionale, sa giunta at refudadu un’ememdamentu sardista pro torrare a ammerare su càpitulu de su sardu veiculare.
In contu de istandardizatzione no at defensadu sa LSC, ma at naradu chi pro issa totu sas propostas ant dignidade paris. Custu, in pràtica, cheret nàrrere chi sa LSC est in perìgulu mannu. Peruna paràula at pronùntziadu pro sa chistione de su diretore de su servìtziu chi una bindighina de dies a como aiat naradu chi si diat èssere isòrvida in pagas dies. Nudda pro Pranu Triennale 2014, Osservatòriu e Cunferèntzia 2014. Finas sas promissas de Neoneli (chirca sotziolinguìsticas e canales tv) ismentigadas.
Intre sos disinnos pro su tempus benidore, s’assessora de Sel at mentovadu sa possibilidade (comente totu sos predetzessores) de fàghere, (sena nàrrere cando), una lege pro su sardu in iscola (ma sa Regione non tenet sas cumpetèntzias chi sunt de s’istadu), un’albu pro sos operadores (però in su mentres lis truncat su dinare) e, a ogni manera, at naradu chi est dispònibile a leare a cussideru calesisiat proposta dae banda de sos ufìtzios.
A beru pagu pro una chi est guvernende dae ses meses e diat dèpere tènnere sas ideas craras in contu de polìtica linguìstica. Semper chi, non las tèngiat craras meda, e non las iscòbiat isetende chi sos ufìtzios siant gasi dèbiles de non pòdere prus reagire.
Leave a comment