Cabuterra: galu atacos de Ruju a Pili e Rossomori

No est prus chieta comente unu tempus sa vida de Oreste Pili. In bidda sua, Cabuderra, sighint a crèschere sas polèmicas subra sa chistione linguìstica. Pustis su cumportamentu de Pili pro su cunvegniu de polìtica linguìstica de unu mese a como (cando aiat aboghinadu in sala ca non l’aiant cumbidadu) s’abbolotu pesadu non sessat.

Christan Ruju, cussigeri comunale sotzialista, contràriu a sa polìtica de isperrare su sardu in duos lados e a favore de s’isperimentatzione de sa Lsc, at fatu girare unu comunicadu in ue atacat a manera rebesta a Pili, a s’assessore Lai e a su Partidu de sos Rossomori, de su cale ambos faghent parte. Pro Ruju sa gestione de su partidu de Muledda e Zedda in Cabuderra est fallimentare e est ora de la acabbare.

«Pro bogare a campu totus sos annos de polìtica de s’asse Pili-Lai-RujosMoros – iscriet Ruju – bastat de los mutire e de lis pedire su dinare de sa Regione pro s’Ufìtziu e sa limba sarda. Totus sos annos de cumandu in bidda de custos sennores los amus connotos sena bìdere ne ufìtzios nen servìtziu pro sa cultura e pro su bilinguismu sardu. E tando totu su dinare pùblicu chi sa regione at dadu custos annos?».

Pro Ruju, sa polìtica linguìstica depet leare un’àteru ghetu. Prus a curtzu a su coordinamentu pro su sardu ufitziale chi faghet semper eventos de importu pro sa promotzione de s’unidade linguìstica e culturale de sa Sardigna intrea.

A bisu de Ruju sos esempros mannos de custu traballu sunt istados su curretore regionale ortogràficu sardu in lìnia, sa programmatzione, sa dirigèntzia sèria e democràtica de s’ufìtziu limba sarda regionale, sos progetos pro su sardu in s’iscola, sa vigilàntzia in sas biddas pro bogare a fora su traballu e sos ufìtzios linguìsticos, sa mediatzione cun sas comunas, sa valorizatzione de sas variantes fonèticas locale, su traballu pro su sardu grammaticale, sos dibatimentos abertos pro totus in cada mese.

Unu traballu e una dimensione regionale dae sos cales Cabuderra no at bogadu profetu ca sos Rossomori ant preferidu una polìtica munitzipale e de isolamentu.

Christian Ruju tancat cun unu augùriu de istima pro su CSU, cumbidende.lu a afortigare sas atziones de «s’isulamentu de s’idea setzessionista de sa limba sarda» chi bidet in su partidu Rossomori sa bandera prus arta in Sardigna.

Sos tempos sunt cumpridos in sa bidda a probe de Casteddu pro una ghirada manna de sa polìtica linguìstica. Sos nùmeros in su cussìgiu comunale bi sunt.