de Giuseppe Pepe Coròngiu
Cando fia prus giovanu andaia cun paritzas tropas de amigos. Fiat bellu a s’ispassiare e a si connòschere, ma non semper b’aiat sentidu. Càmbia càmbia b’aiat s’arriscu finas de faddire cumpangia e a bias de si agatare sena riferimentu. Ispaesadu. Nudda de malu. Totu esperièntzia de vida.
Est su chi m’est bènnidu in conca eris in Santa Justa in s’addòbiu de su movimentu de sa ‘manifestada’ de Cabu Frasca chi cheret aparitzare un’àtera atzione in Casteddu pro su 13 de nadale. Apo proadu unu sentimentu de ausèntzia, de mancàntzia. In ue fiant sos amigos de sa tropa mia?
Eja, m’est partu chi su mundu natzionalitàriu-indipendentista-linguìsticu-sardista (cramadelu comente cherides), finas cussu democràticu o liberale prus abbistu, no esseret bene rapresentadu. Ei, giai bi fiant Bustianu Cumpostu, Gianfranco Sollai e Pier Franco Devias, Peppe Luisi Pala, Aurora Pigliapochi, Monica Pisano, Pierluigi Caria, Marcella Ghiani, ma, a cunforma de cantu bi nd’aiat in sa manifestatzione de cabudanni, su nùmeru est imminorigadu meda.
Crèschidu est in tames, gasi nessi m’est partu, su fiotu de su mundu antagonista, comunista, antimilitarista e gasi e gasi. Nudda de male, est normale cando si faeddat de bases militares chi cussu mundu potzat assoddire.
E apo amigos e connoschent in cue puru.
Naro sa beridade, apo sighidu pagu sas relatas, ca m’est pràghidu de prus a faeddare cun sa gente. E nd’apo bogadu a pìgiu su chi aiat giai prenetadu sa die de Cabu Frasca. Ca, a pustis de una renèssida manna che a cussa, sos problemas comintzant s’incras.
Ite fàghere? Comente medire e indiritzare cussa massa poderosa? Ite punna polìtica leare pro unu movimentu gasi atzudu e cun paritzas cumponentes finas angenas s’una a s’àtera?
E posca s’eterna pregonta: a banda su ‘contra’ a sas bases, cale est su ‘pro’? Cale su disinnu polìticu? Cale sa prataforma pro guvernare su caminu a bias a sa paghe? Cale sa tenta pro defensare sa Sardigna dae ogni casta de atacu e bombardamentu?
Penso chi, lassadu su mamentu ‘contra’ e colados a su ‘pro’ b’apat una diferèntzia manna intre su mundu natzionalitàriu e cussu antagonista-comunista. Eris custa distàntzia si marcaiat. Sas perspetivas sunt diferentes.
No isco si calicunu s’at a ofèndere, ma pro fàghere essire sa Sardigna dae ogni tzerachia (linguìstica, militare, econòmica, culturale) bi cheret unu cuntzetu de guvernu. Una proposta de classe dirigente responsàbile e pragmàtica chi potzat leare s’aficu de su tzitadinu mèdiu, de sa classe economicamente prus avantzada, de sos chi faghent s’opinione pùblica.
In custu, ùmile parre meu sena ofesa pro nemos, mi paret chi su mundu natzionalitàriu, cantu prus possìbile unidu, potzat giogare prus cartas pro su tempus benidore de Sardigna.
A novas a bìdere.
Leave a comment
Caru “pepe” has nadu ‘ene: est su momentu PRO de abbessiare. Penso chi, a paltes sos abboios de protesta, no si nde siana fattos abbastanscia ghjustu pro chistionare de su PRO; e in custos pro ogare a pitzu in istrintu sas chistiones de passare a banca pro esse’ pappadas e digiridas paris dae tottu. Donz’unu ancora est cun sa pietanscia sua ischivitzende sa ‘e sos atteros. Custu siat in problemas de “indipendentismu” chi de “limba”, chi diamus dever haer cumpresu dae tempus chi no podene che biatzare paris. A bisu meu mancamus ancora de una bisione vera e onesta de UNIDADE. La lean binchida sas polemicas chi ch’intuvana sa sustanzia ladina de su problema de ilvoligare. Unu saludu.
Eo so de accordiu Pepe. In Santa Giusta no bi fio pro unu problema de salude, ma custu sos ammaniadores ja l’ischint. Est comunque una cosa meda positiva a si attoviare a pustis de Capu Frasca, dae carchi banda bisonzat puru incominzare. Su chi mi paret zustu a narrer est unu richiamu pro tottus sos indipendentistas: fachites in manera de non fraigare barricadas contras chie no la pessas comente a nois. In custa lotta deppent intrare tottus sos sardos, pro una chistione de defensa de sa terra e proitte custa podet essere una manera de attirare sos atteros a s’idea de s’indipendentzia. In Catalogna sos sindicos mancai no sunt tottus indipendentistas, antas azudadu sa causa pro su referendum. Deppimus nos ponnere in conca chie chenza s’azzudu de tottus sos sardos, no arribamus a nudda.