Ocupare sos ufìtzios de s’assessoradu. Non b’at àteru sèberu. Peruna alternativa. Est sa minetza de unu Comitadu nou chi si chèsciat contra a s’assessoradu de sa cultura. Sos impitzos pigados in su 2012-13 non sunt istados onorados. Dèpidos sena pagamenta. Pro Clàudia Firino un’àteru fronte abertu foras de su CSU.
Custa ferta noa chi dolet, in sa carena de sa polìtica culturale linguìstica, arriscat de èssere sa batalla finale. Sa Waterloo de sa Giunta Pigliaru. Finas si est unu bentu chi si pesat a manera curiosa. Unu comunicadu chi essit in Internet. Sena firmas. Belle clandestinu. Posca s’acrarint sos cuntzetos, sas cumponentes e sas punnas.
Sunt aziendas e sòtzios, titulares de contributos pro sa limba e sa cultura sarda, in sos annos colados. Mai pagados. Arriscant su fallimentu. Medas ant sos dipendentes in cassa integratzione (chi mancu cussa arribat). Àteros bivint isetende unu cras chi no arribbare.
S’ùrtimu corpu est s’assestamentu de bilàntziu in ue si cumprendet chi sa polìtica de sos ùrtimos annos no at à essere sighida. Andat bene (in teoria). Ma su dinare de sos ùrtimos annos chi nos depides? A nos lu pagades?
Peruna risposta. Dae cando Giuseppe Corongiu est decàdidu, nemos sighit prus sas chistiones cuncretas e su servìtziu limba sarda est unu campusantu. Claudia Firino cun Cinzia Isola, Giuseppe Dessena, Antonio Zucca, Antonina Scanu (su chircu màgicu de s’assessora) sunt latitantes. O no ischint ite respostas dare ca in aterue ant detzisu ca sa limba non depet contare.
No abbarrat àteru chi minetzare s’ocupatzione de sos ufitzios de arburada Trieste pro si fàghere ascurtare dae Pigliaru, Paci e Maninchedda, sos meres beros de sa càscia regionale.
Gasi nessi isperant sos promotores de su comitadu. Nde faghent parte, in paritzos, finas nùmenes importantes. In sas dies imbenientes nd’amus a ischire de prus. Pro como contat s’avisu. Pro Clàudia Firino e sos suos lompent dies galu malas.
Leave a comment