Creschent sas adesiones, ismànniat sa partetzipatzione, àmpulat s’isetu. Sa Festa de sa Limba Ufitziale in Sèdilo de domìniga 21 chi benit ‘arriscat’ de divènnere un’eventu de importu. A sos organizadores sunt arribende sas iscritziones de militantes, ativistas, polìticos, giornalistas, sonadores, poetas o simple tzitadinos. Un’aficu mannu chi de seguru at a fàghere bene meda a s’addòbiu aparitzadu dae su Coordinamentu de su Sardu Ufitziale.
S’ispiritu est cuddu de sa festa, ma finas de sa ricurrèntzia cun una capia polìtica. Sos sustènnidores de sa LSC, e de sa polìtica linguìstica, sunt timende chi sa Giunta Pigliaru apat pressiones fortes pro burrare 10 annos de traballu. E chi, in beridade, pagu l’importet de sa chistione. Tando, tocat a s’addobiare pro parare fronte a cust’istadu e fàghere crèschere un’unda de chènscia chi si ispainet finas a Casteddu.
E a sas 9.30 de mangianu (sala Sa primu Ighina) si comintzat cun su saludu de su sìndigu. A costadu pagas relatas e curtzas de sos dirigentes CSU subra sa situatzione polìtica, sa LSC e sos ufìtzios. Posca mesa de arresonu cun sos polìticos. Sighit dibàtitu lìberu e mùsica e giogos pro pipios. A merie un’àteru momentu curtzu de cunfrontu e in fines mùsica e ispàssiu in pratza de Santu Giuanne.
B’at àere poetas, atores, sonadores, libros, produtos locales, cosa a bufare. Una festa ‘culturale’ e popolare a beru chi si isperat batat profetu a sa polìtica linguìstica. E chi serbit finas pro nche catzare cussos pensamentos malos chi sunt intrados in conca a sos ativistas dae cando est intrada a su guvernu sa giunta noa. Mesches sos operadores de sos ufitzios, mèdia e iscola, chi cun sa limba bi campant.
In sos annos de Soru e Cappellacci s’est fatu meda, ma como est totu arressadu. Bogadu de mala manera a Giuseppe Corongiu dae sa diretzione de su servìtziu, in 4 meses sa giunta non nde at nominadu unu nou. Antzis si timet chi non nde burrent s’ufìtziu finas cun s’iscùsia de su respàrmiu de resursas. Su Pranu Triennale no est nen pensadu ne aprovadu e su dinare chi b’est istantziadu (5 milones) arriscat de torrare a muntone. Pro s’iscola ocannu non b’at un’èuro. S’assestamentu de bilàntziu podet ghetare totu a terra.
S’assessora Firino, in s’iscola de istade CSU de Neoneli, aiat chircadu de pigare tempus, ma sas propostas sunt partas aposta pro illonghiare. Prus etotu no at respostu a sas pregontas pro sa chistione de sa Lsc e custu at postu prus pessamentu de totu. S ‘est faeddadu a sa làdina de torrare a s’epoca ante Soru, cussa de su ‘discussionismu’ cun chircas, mesas, cummissiones e tzarra . Est d’ora duncas de pònnere unu puntu chi est bene acraridu in su documentu CSU.
Punna de sa manifestatzione est cussa de promòvere e defensare su protzessu de istandardizatzione e afortigamentu de su sardu in tempos in sos cales prus de una fortza diat chèrrere iscontzare su traballu.
Sa chistione de sa limba in Sardigna pilisat problemas a sas èlites dominantes chi non ponent mai unu puntu firmu. In custos ùrtimos deghe annos, finas cun sa pressione de su Movimentu Linguìsticu, si sunt fatas cosas medas, ma paritzas abarrant de fàghere.
S’ufitzializatzione cumpleta de sa limba pro mèdiu de s’ùnicu standard chi tenimus, sa LSC, est una de custas. In tames a subra de custu sèberu, chi est a fundamentu de cale si siat polìtica linguìstica, non si resesset a lòmpere a una craresa informativa e operativa.
Nde resurtat, a dies de oe, una debilesa de intentu, s’indiferèntzia si non s’ostilidade, de su guvernu regionale presente in su cumbinchimentu chi sa limba ufitziale siat unu problema e non una resursa. E finas s’idea de impreare a dispetu sa ‘cuntierra’ pesada dae sos contra pro non fàghere nudda. Difatis, sa positzione polìtica chi istàgiat sas àteras, pro una polìtica sèria e operativa, est cussa si unu est o no in favore a una limba ufitziale standardizada.
Tando est netzessariu unu momentu de addòbiu e de festa, sèria ma finas lèbia, pro acrarire, informare, denuntziare, cumbìnchere e apasigare subra su tema de sa limba ufitziale e de sos fatos, finas neulosos, chi l’indùrriant. Una Die, aberta a totus, in ue si podet cumprèndere finas in alligra ite est sa limba ufitziale, ite tretu at fatu e ite galu depet fàghere.
Sa LSC no est prus unu simple còdighe amministrativu in essida dae sa Regione. In custos annos est andada a in Seis totus cumbidados. Benide in medas., in sas iscolas e finas in s’universidade. A chie giuat frimmare custa pesada?
Sa Giunta, Su Cussìgiu regionale , sos sìndigos, sos àteros entes e s’opinione pùblica non podent fàghere finta de nudda pro custa chistione imbeniente. Totus sunt cumbidados.
Nos bidimus in Sèdilo su 21 cabudanni dae sas 9.30 a sas 18.
Leave a comment
Bi semus, si poi servidi sa testimonianza de unu istittau in sardo e pro su tribalu s’aranzada a chistionare 5 limbas! Presente. A nos videre in salude