redatzione
Sàbadu su 13 de cabudanni (a is 4,30 de merie) a probe de sa base de Cabu Frasca s’at a tènnere una manifestatzione contra a is tzerachias militares. No at a èssere una cale si siat manifestatzione. E su chi is sardos sunt pedende no est una mèngua de cussu “pesu”. Est a nàrrere, su sentidu chi immoe est animende is chi ant a manifestare (e no amus a èssere pagos) no est su de “Procurade de moderare o guvernu sa tzerachia”.
E is “guvernantes minores”, si a beru ddu bolent rapresentare custu sentidu, non si devent limitare a nàrrere chi a nd’àere una est mègius de nd’àere tres. Est a non nde bòlere. Pro duos motivos.
Su primu est chi, chistionende de “pesu” semus difatis narende chi sa Sardigna podet sighire a ddu “bajulare”, mancari chi in parte minore, aparinende·nos a su restu de s’Itàlia (betze sovranismu!) e mentovende sa cantidade ebbia (ite b’ant a fàghere in s’ùnicu chi at a abarrare?).
Su segundu est chi s’istòria nos mustrat chi podent èssere is militares etotu a nos “cuntzèdere” sa mèngua. Pigliaru in s’interventu suo in s’àula de su cussìgiu regionale dd’at naradu a manera crara: «su retiru de is americanos dae sa Madalena at àpidu resones particulares, dèvidas mescamente a unu mudòngiu de istrategia militare a pustis de sa ruta de su muru de Berlinu».
A pedire su mìnimu, a punnare a su retiru graduale est unu arriscu mannu. Finas ca s’interlocutore non podet èssere (ebbia) s’istadu italianu (guvernu e militares). S’interlocutore est su tzitadinu sardu chi pro milli resones nos narat chi est mègius a ddos lassare (ca no incuinant, ca dant traballu e gasi sighende). Si su sentidu chi amus como est (nuschende·ddu) majoria, custa majoria bolet contivigiada e afortigada e pro àere custu resurtadu est pretzisu a lassare a un’ala su “pesu” e a pònnere a cùrrere sa prus manna rivendicatzione polìtica pro una Sardigna de paghe in unu mundu in ue su fusile est semper de prus sa pròtesi de su bratzu polìticu de is istados.
Limba sarda 2.0 leat parte a sa manifestatzione (at aderidu finas su Csu) cun s’atinu chi sa batalla contra a is tzerachias militares est ligada a pare a sa de s’amparu, de s’afortiamentu e de sa difusione màssima de sa limba nostra. Pro una Pratobello noa…atza bi bolet!
Leave a comment