In s’ìnteri chi sighint is cuntierras a pitzu de sa “chistione gràfica”, addòbios che a su de Boruta de su 24 de austu nos mustrant ite bolet nàrrere traballare pro su sardu e pro chi issu siat una limba normale finas pro sa «sa comunicatzione a livellu “artu” comente est sa sièntzia». Sighende s’atividade de sa fundatzione Smirg (Sardinian mediterranean imaging research group) chi in su situ suo (smirg.org) impitat limbas de minoria che a su sardu e a su catalanu, s’addòbiu at a bìdere sa presèntzia de su mèigu radiòlogu Pitzente Migaleddu, dae tempus impinnadu pro amparare s’ambiente e sa limba che a patrimònios de sa terra nostra.
«In totus sas limbas de un’istadu – est su chi leghimus in su comunicadu de s’addòbiu – comente in sas limbas de minoria b’at sa chistione de sestare limbàgios, introduire e ammodernare tèrmines chi iscant afrontare sos temas noos ispetzìficos chi essint a campu in su mundu de sa sièntzia e de sa tècnica. In sas matèrias umanìsticas e in sa literadura sua, su significu e su valore semànticu de una paràula càmbiat cun sa sugetividade de un’autore; in sas limbas de minoria sa partzidura in faeddos locales e sa mancàntzia de un’istandard linguìsticu de riferimentu giughet a unu isminorimentu semper prus forte de su campu semànticu de una paràula, serrende·la in microàmbitos locales perdende gasi su podere de comunicare. Pro s’isvilupu de unu limbàgiu sientìficu bi cheret sa chirca de tèrmines unìvocos chi tèngiant su matessi significu in totu sa comunidade iscientìfica, locale e globale».
Iscudende una ograda a su programma (postu inoghe in suta) bidimus chi ant a leare parte su diretore de Limba sarda 2.0 Pepe Coròngiu, su maistru e editore Diegu Corràine, su diretore de su Termcat Jordi Bover, su presidente de sa “Societât Sientifiche e Tecnologjiche Furlane” Marzio Strassoldo e su cabu-grupu de is Rossomori Emilio Usula. Curiosa sa presèntzia de Coròngiu e Ùsula in su matessi addòbiu a dae chi pro more de su cussigeri sovranista aiat blocadu sa norma de urgèntzia pro cunfirmare su diretore de su Servìtziu limba sarda: in sa cunferèntzia de sos cabu-grupos bi bolet s’unanimidade e galu semus sena diretore cun s’arriscu de no àere continuidade cun su traballu fatu in sos annos colados.
PROGRAMMA SIÈNTZIA E LIMBA
- h 8,30 – Saludos de sos organizadores
- h 8,45 – Pro una polìtica linguìstica in Sardigna >Pepe Corongiu
- h 9,15 – Literadura umanìstica e sientìfica in sas limbas de minoria >Diegu Corraine
- h 9,45 – Paràulas e tèrmines in meighina : esperièntzia de sa Fundatzione SMIRG >Pitzente Migaleddu
- h 10,15 – Pasu e cunfrontu
- h 10, 45 – Limbàgios tècnicos e sièntificos in sa limba catalana >Jordi Bover, diretore de TERMCAT (Tzentru de terminologia catalana), Catalugna
- h 11, 15 – Limbàgios tècnicos e sientìficos in sa limba Friulana >Marzio Strassoldo, presidente de sa “Societât Sientifiche e Tecnologjiche Furlane”
- h 11, 45 – Problemas e solutziones: esperièntzias a cunfrontu >Pepe Corongiu, Diegu Corraine, Pitzente Migaleddu, Emilio Usula
- h 12,45 concruida