S’assessoradu regionale de sa cultura in custu ùrtimu mese at gastadu pro totus, ma non pro sos de sa limba. S’assessora incarrigada pro tempore Claudia Firino at fatu ischire custas dies chi issa est in favore de su sardu, ma s’atividade amministrativa de sos ufìtzios suos paret chi nèrgiat s’imbesse.
Universidades, àteras regiones, museos, istitutziones istatales, ministeros, festival italianistas e benefitziarios vàrios. A totus unu pagu de dinare liberadu dae su Patu de Istabilidade. Ma a sa limba de seguru nudda in custos primos ses meses de atzione. At gastadu de prus su guvernu italianu chi, cun su Dipartimentu de sos Afares Regionales, at comunicadu sa cifra sòlita (semper prus minore) chi si destinat a sos ufìtzios linguìsticos. Antzis, b’at de nàrrere chi sa Regione at chircadu de los fàghere colare comente investimentos suos, ma cun pagu o nudda profetu ca sa gente ischit bene sas cosas .
In su mentres sighint sas istrinas pro sos ateneos. Cun sa delìbera N. 28/15 de su 17 de trìulas 3.220.000 a Casteddu e Tàtari pro implementare su programma Eramus plus giai finantziadu dae s’Unione Europea. Ma sas universidades finantziant dae duas càscias? O ite non bi sunt resessidos a otènnere su finantziamentu dae s’Europa e tando piscant dae su riu luadu de sa Regione? Cun sa delibera 29/10 de su 22 de trìulas si modificant 100.000 èuros pro su musei Tavolara, 400.000 èuros a ‘Virtual Archeology’. Cun sa nùmeru 28/6 de su 17 de trìulas 100.000 èuros a sa Regione Toscana pro achirire unu modellu software de anagràfe iscolàstica. Cun sa delìbera n. 26/7 de s’8 de trìulas prus de 6 miliones de èuros de fundos P.O.R. FERS a su Tzentru ministeriale de restàuru de Li Punti, a su recùperu de sa tipografia Chiarella de Tàtari, pro Villa Laura in Casteddu, e a su Museu Istatale de Casteddu pro li fàghere s’àrea conditzionada. Duncas dinare s’assessoradu in unu mese nd’at mòvidu meda, ma a sa limba o a is ufìtzios linguìsticos nudda.
Leave a comment
