Redatzione
Sa cumpangia LucidoSottile est in custas dies de trìulas in Madrid in ue at a rapresentare in iscena “In su chelu siat”, sa versione in limba sarda de s’ispetàculu “Holy Peep Show”. S’ispetàculu teatrale, firmadu dae Tiziana Troja e Michela Sale Musio, est in su cartellone de s’importante Fringe Festival e at a andare in iscena in su Matadero in cada una de is duas dies, a is 19 e a is 20:30. LucidoSottile at a èssere s’ùnica cumpangia de s’istadu italianu presente in su festival. Ma, comente ant naradu issas etotu in un’intervista, sunt in cue in nòmene de sa natzione sarda.
Carchi mese como, LucidoSottile aiat ativadu unu giassu, www.fondolucido.com, pro mesu de su cale s’est fatu finantziare una parte de sos gastos de s’ispetàculu in Madrid. Is ispetadores sunt essidos a èssere gasi produtores de sa pièce. Sa lassa mìnima fiat de deghe èuros, ma sa generosidade de is amantes de su teatru e de su pùblicu de LucidoSottile depet èssere istada finas prus manna.
Pro custa trasferta in Madrid, favoressida dae su tzìrculu de is sardos Ichnusa, e dae su Servìtziu limba sarda de sa Regione, sa cumpangia casteddaja at duncas pedidu un’agiudu a su pùblicu suo. “In su chelu siat”, difatis, at 23 atores de pagare e rapresentat unu disafiu culturale e econòmicu mannu in unu tempus chi is aorros a sa cultura dae parte de is amministratziones sunt a dolu mannu semper prus mannos. Sos amigos de sas duas artistas ant respostu e tando s’ispetàculu podet èssere fatu in custa sea de giudu. Pro sos ritardatàrios In prus de su giassu est a disponimentu unu contu corrente bancàriu intestadu a LucidoSottile, IBAN IT97F0709604800000000000583.
Meressimentu mannu pro custa resèssida finas de Gianni Garbati, animadore de su tzìrculu de sos sardos de Madrid, chi est un’operadore semper ativu de sa cultura e limba sarda in una capitale europea manna e de importu. No est sa primu bia chi Garbati organizat initziativas de profetu pro sas polìticas de su bilinguismu.
“In su chelu siat” cundit a manera ispantosa su contu de Pinòchiu cun carchi tema de fundamentu de su cristianesimu, in unu cuncordu artìsticu isciocante chi ponet a paris teatru, dantza e artes visuales. Sa bortadura in sardu de custu cabu de òbera l’aiat fata Mariantonietta Piga. Amus a bìdere comente l’at a acasagiare su pùblicu de Madrid.
Limba Sarda 2.0 b’at a èssere.
Leave a comment