de Giuseppe Pepe Coròngiu
Su Corecom cheret a cummissariare cun una norma su Servìtziu limba sarda de sa Regione? Paret gasi dae una proposta de lege firmada dae su PD, in primis, dae Pietro Cocco, capugrupu de su Partidu Democràticu in Cussìgiu Regionale. Nessi pro su chi pertocat sas cumpetèntzias de polìtica linguìstica in sos mèdias. S’idea est de pònnere totu sos finantziamentos a sa limba in tv, ràdiu, giornales e web a suta de su controllu de su Comitadu Regionale pro sas Comunicatziones, organismu tècnicu-polìticu chi funtzionat in su Cussìgiu Regionale, e de limitare, si non esautorare in totu, in custa matèria, sas cumpetèntzias e sas funtziones de Assessoradu de s’Istrutzione Pùblica.
Comente si leghet in sa proposta de lege nùmeru 65, presentada su 25 de làmpadas coladu cun sas firmas de Cocco e de sos cussigeris Forma, Manca, Sabbatini, Cozzolino, Demontis, Moriconi, Solinas, Piscedda, Comandini e Lotto, sa punna est cussa de dare prus poderiu esecutivu e ampramanu a su Corecom pro sa gestione de custos finantziamentos particulares. In s’annu 2013, su Cussìgiu at destinadu pro custa boghe de bilàntziu belle 4 miliones de èuros (pro su prus andados a sas televisiones) e ocannu sa summa prevèdida est de belle 2 (si Deus cheret e su patu de istabilidade lu permitit).
In sa proposta, titulada «Modifiche alla legge regionale 28 luglio 2008, n. 11 (Istituzione del Comitato regionale per le comunicazioni della Regione autonoma della Sardegna)», e chi in generale s’impitzat de torrare a organizare còmpitos, istrutura e funtzione de custu organismu, b’ant apitzigadu unas cantas normas chi chircant de ghetare a su Corecom funtziones amministrativas e gestionales meras e sìncheras chi diant tocare a sos ufìtzios regionales e a s’esecutivu, non a un’organismu de controllu de su poderiu legislativu.
In su comma h de s’artìculu 2 si bi leghet:
predispone d’intesa con la Presidenza della Regione le linee guida per le convenzioni previste nell’articolo 12, comma 2, della legge 15 dicembre 1999, n. 482 (Norme in materia di tutela delle minoranze linguistiche storiche), e nell’articolo 14, comma 1, della legge regionale 15 ottobre 1997, n. 26 (Promozione e valorizzazione della cultura e della lingua della Sardegna), verificando la loro corretta attuazione
cando sos indiritzos polìticos pro eventuales conventziones sunt una cumpetèntzia de sa Giunta e de s’Assessore cumpetente. E finas s’averguadura e s’acumprimentu est si in casu cumpetèntzia de àteros organos istitutzionales. Ma, chie at propostu custa lege a sos cussigeris PD in bona fide, non s’est tratesu cando at iscritu in su comma imbeniente chi su Corecom:
…predispone le graduatorie delle emittenti radiotelevisive che partecipano ai bandi regionali di cui alla lettera h)…
una funtzione tìpica de sos ufìtzios amministrativos regionales, mancu de s’assessore, non de organismos de su Cussìgiu a prope de su poderiu polìticu. Una faddina basilare de deretu amministrativu. E prus a in antis, s’autore de sa lege, s’atrivit a pònnere in contu a su Corecom finas chi
…vigila sul rispetto delle norme regionali e statali in materia di tutela delle minoranze linguistiche.”…
Non mancu sas cumpetèntzias radiotelevisivas, tando, ma totu cussas de sas leges linguìsticas. Còmpitu chi de seguru no est su suo. O non petzi su suo. Un’ambitzia de cummissariamentu totale.
Ite nàrrere? Dae cando s’ufìtziu de sa limba sarda est abarradu sena ghia est comintzada una gherra de totus contra a totus muda e frita pro pònnere sas manos subra sa gestione de sa polìtica linguìstica. Sa classe dirigente sarda no est cumpetente in argumentu e podet rùere in milli trampas pro more de malos cussigeris e proponentes incumpetentes.
Est ladinu, e unu calesisiat funtzionàriu lu cumprendet, chi una lege aprovada cun custos commas diat creare unu cunflitu insanàbile de cumpetèntzias intre Giunta e Cussìgiu. E in prus diat fàghere su protzedimentu meda prus grae e longu cun andalitorras sighidos intre Giunta e Cussìgiu. E custu cheret nàrrere meses in prus pro serrare una pràtica. Ma, tando, pro ite dare custos poderios amministrativos a su Corecom cando no lis pertocant pro nudda? Pro carculare a calicunu ebbia? Ma non si depiat semplificare su protzedimentu?
De seguru calicunu ‘sciamanu’ linguìsticu interessadu at cumbintu a sos cussigeris regionales PD in fide bona chi tocaiat a fàghere gasi e issos, coidadodos de fàghere, ant firmadu sena bi pessare meda. Ma a su primu controllu de sos ufìtzios custas normas las ant a burrare de seguru. E sos cussigeris ant a pòdere fàghere bìnchere sa capassidade issoro.
Abarrat su discuidu e s’atrivimentu coladu in atos ufitziales. E posca, mi pregonto: non s’at a ofèndere sa Giunta pro custa tentada de fura de cumpetèntzias? E Claudia Firino informada l’ant? E sos ufìtzios de s’assessoradu abigiados si nde sunt chi sunt chirchende de los minimare e annuddare?
Sena cumpetèntzias non b’abarrant setores, servìtzios e mancu diretziones generales. Sighende gasi.
Leave a comment