Sunt istadas de importu aberu sas duas dies intregadas a sa limba sarda fatas in Tàtari su 22 e su 23 de santugaine colados. In capas b’at sinnos de rinaschida de su movimentu de sa limba chi at mustradu a totus sa fortza chi est capassu de isboligare. Su sàpadu sos dischentes universitàrios ant organizadu unu cunvegnu in s’àula magna de s’universidade e unu cuntzertu su sero. Sa domìniga s’Istitutu Camillo Bellieni at promòvidu unu addòviu mannu de sos militantes subra sos chimbanta annos de polìtica linguìstica.
A sas duas fainas ant partetzipadu ativistas, tzitadinos, iscritores e autoridades e finas su retore de s’Universidade Attilio Mastino e s’assessore de s’istrutzione pùblica Sergio Milia. A bisu de sos organizadores prus nòdidos Micheli Pinna e Mario Carboni, b’at àpidu una leada de cussèntzias prus manna e como tocat de la mudare in atentu cuncretu.
B’at de cumprèndere galu duas cosas: una proite su Movimentu resesset semper a creare clima e cuntestu favorevole e non nde leat profetu (est costadu pustis de Paulilatino, Macumere e àteras bias) e posca proite militantes medas sunt galu prenos de unu paru de Sindrome de Istocolma e non connoschent sos innimigos cuados de sa limba chi bi fiant presentes finas in sala e ant faeddadu.
Efes Planetta, consigeri regionale de su Partidu Sardu at fatu una denùntzia manna: petzi su 0,40 pro chentu de su bilàntziu de s’assessoradu est intregadu a sa polìtica linguistica. Diego Corraine at atacadu su retore Mastino pro sa cuntierra contra a su sardu veiculare.
Galu b’at meda de imparare pro sos militantes.
Leave a comment